Жаркент жоғары педагогикалық колледжінде «Бүгінгі студент – ертеңгі жас маман» атты семинар өтті.
Колледж түлектерінің кәсіби дамуына қолдау көрсету, балабақша, мектеп, колледж арасында өзара ынтымақтастық орнату және колледж түлектерінің жұмысқа орналасуына ықпал ету мақсатында өткен аудандық семинар барысында жастардың жауапкершілігі, болашаққа деген ізгі қадамы, арман-мақсаты сөз болды.
Аталған семинарға Панфилов аудандық білім бөлімінің әдіскері Т. Әлғазиева, мектеп директорлары мен балабақша меңгерушілері, колледж оқытушылары қатысты.
Жаркент жоғары педагогикалық колледжінің директоры К. Курабалдиева ашып, жүргізіп отырған шарада педагогика ғылымдарының магистрі Н. Асанова «Колледж жағдайындағы қолданбалы бакалавр: ерекшеліктері мен мүмкіндіктері», педагог-зерттеуші, арнайы пән оқытушысы М. Теңізбаева «Колледж балабақша: теориядан іс-әрекетке», «Таңшолпан» балабақшасының әдіскері А. Әсембекова «Тәрбиеші міндеттері мен ұйымдастырушылық қызметі» атты баяндамаларын ұсынды. Колледж психологі Ұ. Қыдырбаева «Біз біргеміз» тренингін ұйымдастырды.
Басқосу барысында мектеп директорлары жас мамандарды жұмыспен қамту, сапалы білім беру, демонстрациялық біліктілік емтиханын өткізу мәселелерін талқылады.
Семинар соңында колледж студенттері дайындаған шағын концерт ұсынылып, барлық қатысушыға сертификат табысталды.
Мұхтархан ТОЙҒҰЛОВ,
Жаркент жоғары педагогикалық колледжі директорының оқу өндірістік жұмысы жөніндегі
орынбасары
