Талдықорғанда Жетісу облысы полиция департаменті мен облыстық білім басқармасының ұйымдастыруымен жас жол инспекторларының облыстық слеті өтті.
Бұл шара – балалардың жол қозғалысы ережелерін меңгеріп, қауіпсіздік мәдениетін бойға сіңіруіне бағытталған маңызды бастама.
Слет барысында қатысушылар тоғыз түрлі кезең бойынша өз білімдері мен дағдыларын сынға салды. Атап айтқанда:
«Жол жүрісі қағидаларын білгірлері», «Үгіт-насихат», «Велосипедті мәнерлеп жүргізу», «Автоқалашықта қозғалу», «Жас реттеуші», «Білгірлер турнирі», «Жас санитар», «Үздік насихаттаушы» және «Ашық үзіліс» сияқты байқаулар өтті.
Жарыс тек оқушылар арасында ғана емес, сонымен қатар полиция қызметкерлері мен білім беру ұйымдарының өкілдері арасында да ұйымдастырылып, іс-шараның маңызын арттырды.
Жалпы командалық есеп бойынша:
-
1-орын – Көксу ауданы,
-
2-орын – Сарқан ауданы,
-
3-орын – Талдықорған қаласы.
Жеңімпаз Көксу ауданының командасы енді тамыз айында Шығыс Қазақстанда өтетін Ғазиз Байтасов атындағы Жас жол инспекторларының XX республикалық слетінде Жетісу облысының намысын қорғайды.
Бұл шара жасөспірімдерді тәртіпке, жауапкершілікке тәрбиелеп, олардың бойында жолдағы қауіпсіздікке деген сана мен заңға құрметті қалыптастыруға үлкен ықпал етті.
«Жетісу-Ақпарат»
