Жетісу облысында әскери мамандықты таңдаған жастар мен Отан қорғау саласында қызмет еткісі келетін азаматтарды іріктеу жүргізілуде. Бұл туралы Бейсен Құранбек атындағы Журналистер үйінде өткен брифингте ҚР ҰҚК Шекара қызметі Жетісу облысы бойынша департаменті Кадр бөлімінің бастығы Нұрсұлтан Нұрпейісов пен Кадр бөлімінің консультанты Әсет Базарбеков мәлімдеді.
Кездесу барысында мамандар әскери оқу орындарына құжат тапсыру тәртібі, үміткерлерге қойылатын талаптар және Шекара қызметіндегі жұмыс мүмкіндіктері жөнінде ақпарат берді.
Жастар Шекара академиясымен қатар Ресей мен Түркиядағы әскери жоғары оқу орындарында білім ала алады. Үміткерлердің жасына және білім деңгейіне қатысты талаптар белгіленген. Бұған қоса олар медициналық тексеруден, дене дайындығы мен психологиялық жарамдылық сынағынан өтеді. Арнайы тексеру де қарастырылған. Бұл рәсім шамамен 3-4 айға созылады.
Іріктеу конкурстық негізде өтеді. Мұнда ҰБТ нәтижесі де ескеріледі. Жалпы мамандықтарға үміткерлер кемінде 50 балл жинауы тиіс, оның ішінде әр пән бойынша көрсеткіш 5 балдан төмен болмауы қажет. Дәрігерлік бағыттар үшін шекті балл – 70.
Әскери оқу орнын тәмамдаған курсанттарға «лейтенант» атағы беріледі. Қызмет барысында мамандарға ақшалай төлемдер, қызметтік тұрғын үй немесе тұрғын үй төлемдері, ақылы демалыс және медициналық көмек қарастырылған.
Жоғары білімі бар азаматтар үшін Шекара қызметінде алты айлық даярлау курстары да бар. Оқу бағдарламасына шекаралық бақылау, тәрбие жұмысы, материалдық-техникалық қамтамасыз ету, байланыс және ақпараттандыру бағыттары енгізілген. Оған 30 жасқа дейінгі азаматтар қатыса алады. Сонымен қатар запастағы офицерлерді қызметке тарту қарастырылған. Сұранысқа ие бағыттардың қатарында медицина, байланыс және ақпараттық технологиялар, ветеринария, психология, журналистика, қаржы және құқық салалары бар.
Келісімшарт негізінде 18 жастан бастап белгіленген шекті жасқа дейінгі азаматтар қызмет атқара алады. Үміткердің мерзімді әскери борышын өтеуі, әскери кафедрада білім алуы немесе тиісті даярлықтан өтуі қажет.
– Бүгінгі таңда Жетісу облысы бойынша департаментте офицерлік құрамға, Шекара академиясына және жоғары оқу орындарына бағытталатын жастарды іріктеу, сондай-ақ келісімшарт негізіндегі қызметке үміткерлерді зерделеу жұмыстары жүргізіліп жатыр. Барлық рәсімдер қолданыстағы заңнама талаптарына сәйкес жүзеге асырылады, – деді ҚР ҰҚК Шекара қызметі Жетісу облысы бойынша департаменті Кадр бөлімінің бастығы Нұрсұлтан Нұрпейісов.
Шекара қызметінің өкілдері әскери мамандыққа қызығушылық танытқан жастарға қойылатын талаптарды алдын ала зерделеп, қажетті құжаттарды уақытылы жинақтауға кеңес берді.
Аяулым Шынгаева
