Талдықорғанда жазғы демалысқа арналған «Taldyk Summer» фестивалі ресми басталды. Қаладағы жағажай аумағында өтекен шара жоғары деңгейде ұйымдастырылды. Жоба биыл заманауи форматта көрініс тауып, тұрғындар мен қала қонақтарына ұмытылмас әсер сыйламақ, – деп хабарлайды 7-su.kz ақпараттық порталы.
Мереке өнерлі балалар мен «Бриллиант» шығармашылық орталығы тәрбиеленушілерінің тамаша концерттік бағдарламасымен ашылып, жиналған қауымға көтеріңкі көңіл-күй сыйлады. Одан бөлек жастардың ұйымдастыруымен өткен ауқымды квест ойындары, интерактивті бағдарламалар мен SUP-доска аймағындағы шаралар келгендердің қызығушылығын арттырды.
Күні бойы болған мерекелік шара барысында келушілер жаңартылған 30-дан астам фуд-корт пен гастроаймақтарда демалып, балаларға арналған 10-нан астам арнайы ойын алаңын тамашалады. Байқауға белсене қатысқан тұрғындар арнайы сыйлықтарға ие болды.
Тұрғындардың жазғы демалысын мазмұнды етуді көздейтін бұл ауқымды «Taldyk Summer» жобасы тамыз айына дейін жалғасып, жаз бойы түрлі мәдени, спорттық және ойын-сауық бағдарламаларын ұсынатын болады.
