Қазақстанда Мемлекет басшысы Қасым-Жомарт Тоқаевтың бастамасымен жүзеге асырылып жатқан «Ұлттық қор – балаларға» бағдарламасы жас ұрпақтың қаржылық болашағын қамтамасыз етуге бағытталған маңызды әлеуметтік жобаға айналды. Бағдарлама аясында Ұлттық қордың инвестициялық табысының бір бөлігі балалардың жеке жинақ шоттарына аударылып, олардың болашақта білім алуы мен баспаналы болуына мүмкіндік жасалады, – деп хабарлайды 7-su.kz ақпараттық порталы.
Үкіметтің мәліметінше, жоба 2024 жылдан бастап іске қосылды. Бағдарлама шартына сәйкес, Ұлттық қордың жыл сайынғы инвестициялық табысының 50 пайызы Қазақстанның кәмелет жасына толмаған азаматтарының арнайы жинақтаушы шоттарына бөлінеді. Жинақталған қаражатты балалар 18 жасқа толғаннан кейін тұрғын үй сатып алу немесе білім алу мақсатында пайдалана алады.
Бағдарламаның алғашқы жылында оған 6,91 миллион бала қатысып, әр қатысушының шотына 100,52 АҚШ доллары көлемінде қаржы аударылды. Ал 2025 жылы жобаға қатысушылар саны 6,92 миллион балаға жетіп, бір балаға тиесілі төлем көлемі 129,38 АҚШ долларын құрады.
2026 жылдың қорытындысы бойынша қаражат 6,91 миллион баланың есепшотына аударылды. Биыл әр баланың шотына 130,71 АҚШ доллары көлемінде қаражат түсті.
Үкіметтің хабарлауынша, бағдарлама іске қосылған сәттен бастап үздіксіз қатысып келе жатқан балалардың жинағы инвестициялық табысты қоса есептегенде 370,56 АҚШ долларына дейін жеткен.
Үш жыл ішінде «Ұлттық қор – балаларға» бағдарламасы аясында жалпы көлемі 2,3 миллиард АҚШ доллары бөлінді. Бұл қаражаттың едәуір бөлігі кәмелет жасына толған жастардың шоттарына аударылған. Атап айтқанда, 18 жасқа толған азаматтарға 238,5 миллион доллардан астам қаржы бағытталды.
Бағдарламаны пайдалану көрсеткіштері де жыл сайын артып келеді. Қазіргі уақытта 297 мыңнан астам өтінім мақұлданған. Оның ішінде тұрғын үй жағдайын жақсартуға арналған 187 мыңнан астам өтінім бойынша 33 миллион доллардан астам қаражат жұмсалған. Сонымен қатар білім алу мақсатындағы 110 мыңнан астам өтінім мақұлданып, бұл бағытқа 19 миллион доллардан астам қаржы бағытталған.
«Ұлттық қор – балаларға» бағдарламасы елдегі әрбір баланың болашағына инвестиция салудың нақты тетігі ретінде қалыптасып келеді. Сарапшылардың пікірінше, жоба жастардың әлеуметтік мүмкіндіктерін кеңейтіп қана қоймай, ұзақ мерзімді қаржылық тұрақтылықты қамтамасыз етуге де ықпал етеді. Бүгінде бағдарлама мыңдаған жасқа баспана мәселесін шешуге және сапалы білім алуға жол ашып отыр.
