Жан толқытқан әсем ән мен тәтті күйдің көңілге түрлі ой салған керім кешіне көзайым болдық. Сан талантты тоғыстырған Дәнеш Рақышев атындағы облыстық филармонияның өнерпаздары жетісулық жайсаң жұртқа дәуір күмбірін шертіп, көрерменнің көңілін көкжиекпен астастырған «Әнмен атқан таңдар-ай!» атты дәстүрлі ән кешін ұсынды.
Сан ғасырлық мехнат пен тартқан азап, қуаныш пен қайғы, шаттық пен шерді ұлт аспабының қасиетті шанағына қондырып, қобызының қыл пернесі, домбырасының қос ішегінен саз қылып ұшырған елдің күйі киелі. «Елім-ай» деп әндете ұлан-ғайыр даладан тыныштық пен береке, бақ тілеген елдің дәуір соқпағындағы дамылсыз күндеріне әсем әні дәру. Ал, сол ән мен күйдің тәттісі, мың жылдық бояуы қанық өміршеңі тыңдарманды еліктірмей, елітпей қойсын ба?
«Әнмен атқан таңдар-ай!» ән кешін тамашалаған жетісулықтардың тебіренісі мен толқынысы ерекше көрінді.
Арнайы қойылым арқылы өрбіген концертте Кенен, жыр алыбы Жамбыл, Әсет пен Дәнештердің образы сомдалып, асқақ әндері орындалды. «Қайран жастық», «Саясында алманың», «Қысмет», «Көкшолақ», «Ой, бұлбұл», «Ләйлім шырақ», «Айтбай», «Игигәй» секілді авторлық, халық әндері шырқалған ғажайып кеште Жамбыл мен Айкүмістің айтысынан да үзінді айтылды. «Той думан» секілді би биленіп, Абылай Қармысов, Қанат Түндебаев, Сәбинұр Қаһарман, Бақберген Асқарбеков, Сая Есенгелдинова бастаған филармонияның талантты ұжымы тұтасымен өнер көрсеткен рухани шарада тебіренбеген көрермен қалмағандай әсер етті.
Ұлы тұлғаларымыздың, қазақ өнеріне өлшеусіз үлес қосқан әншілердің образы сомдалған кеште күйбең тірлік ұмыт болып, мың жылдық өнер керуенімен бір тербелгендей болдық. Осынау кештің соңы филармония өнерпаздарының «Әриайдай» халық әнін шырқауымен мәресіне жеткенін де айта кеткен жөн.
Арда БИ
