Әбдіжаппар Қыстаубаевтың есімі аудан, облыс көлемінде ғана емес, республика деңгейінде кеңінен танымал. Ауылының қамын ойлап, жерлестеріне қажетті жағдай жасап жүрген меценат облыс экономикасының дамуына сүбелі үлес қосып келеді. Ол басқаратын «Агрофирма Бірлік» жауапкершілігі шектеулі серіктестігі Балқаш ауданындағы ісі ілгері басқан ірі де іргелі шаруашылық кешені.
Алматы облыстық мәслихатының депутаты Әбдіжаппар Өгізбайұлы еңбек жолын кеңшарда қарапайым жұмысшы болып бастаған. Кейіннен гидротехник, бригадир сынды қызметтерді абыройлы атқарып, ауыл шаруашылығының, оның ішінде күріш егудің қыр-сырын меңгереді. Бүгінде 300-ге жуық адамды тұрақты жұмыспен қамтып отыр. Маусымдық науқан кездерінде жұмысшылардың саны 500-ге дейін жетеді. Оларға 120-150 мың теңге аралығында айық төлеп, материалдық жағынан да қолдау көрсетеді. Бұдан бөлек табысы төмен, аз қамтылған, көпбалалы отбасыларға, қарттар мен мүгедектерге көмек қолын созады. Жыл сайын тұрғын үй-коммуналдық шаруашылыққа 15 миллион теңге бөліп, үйі жоқтарға баспана алып беру, үйлерін жөндеуден өткізу секілді қайырымдылық шараларын дәстүрге айналдырған. Сондай-ақ, Бірлік ауылдық округінде жастарды спортқа баулу мақсатында ауылдастарына арнап «Достар» спорттық алаңын жабдықтап, ескі қонақ үйге жөндеу жұмыстарын жүргізді. Жаттығу залын ашуға демеушілік танытып, ауылға кіреберіс арка, спорт зал, мешіт, тойхана, саябақ, балалар алаңы сынды нысандарды салып, халық игілігіне берді.
Спорт жанашыры, «Құрмет» орденінің иегері Әбдіжаппар Қыстаубаев «Рухани жаңғыру» бағдарламасы аясында ұйымдастырылған «Жомарт жүрек» сыйлығының «Жыл тұлғасы» аталымының жеңімпазы атанды. Ауылын көркейтуді мақсат тұтқан кәсіпкер-меценат Моңғолия Республикасынан және Қарақалпақстаннан тарихи отанына оралғандарға жәрдемдесіп, 50 отбасын тұрғын үймен қамтамасыз етті. Осы орайда даңқты балуан Жақсылық Үшкемпіровтің: «Менің бір арманым бар. Елімізде көп болса 5 мыңнан аса ауыл бар шығар. Соны қазақтың 5 мың жігіті көтеріп жіберсе, одан артық қандай бақыт керек. Мен соны ойлаймын», – деген арманы ойға оралады. Шынымен, көпшілік қалаға көшуді үрдіске айналдырған тұста, ауылдағы ағайынға жағдай жасау – құптарлық, әрі үлгі тұтарлық бастама.
2001 жылы құрылған «Агрофирма Бірлік» жауапкершілігі шектеулі серіктестігі қажетті техникамен толық қамтылған. Биыл 800 гектарға күріш, 1100 гектарға бидай, 3547 гектар жерге көпжылдық шөп екті. Әбдіжаппар Өгізбайұлын алаңдатқан мәселе жоқ емес. Ол – су тапшылығы. Бұрын 2000 гектарға дейін күріш егетінінің айтқан кәсіпкердің пікірінше, Іле өзенінің суы тартылып барады. Сондықтан күріш алқабының көлемі азайып отыр. Сонымен қатар, Миялы, Бақбақты, Бірлік ауылдарының егістігіне су жеткізетін «Тасмұрын» магистралді каналының арнасын жаңарту қажеттігін де жиі қозғайды. Су тапшылығынан болашақта суармалы жерлерге күріш дақылы егілмесе, экологияға да кері әсерін тигізді.
Мәулен ӘНЕРБАЙ
