«Әйелдің қырық жаны бар», «Қызға қырық үйден тыйым», деген мақалдарды кейбіреулер нәзік жандылар еркектен төмен тұру керек деп түсінеді. Ата-бабамыз әйелге қашан да құрметпен қараған. Мысалы, «Әйелдің қырық жаны бар» деген сөздің арғы жағында «Қырық жанын бір ауыр сөз жаралайды» деген жалғасы барын біле ме екен?! Мақал әйелдің нәзік жанын жаралап алмау үшін тілге сақ болу керектігін ескертеді. «Қызға қырық үйден тыйым, ұлға отыз үйден ақыл» деген мақал қыз баланың тәрбиесіне барша жұрттың жауапты екенін, ұлдарды жөнге салуға да ел жауапты екенін білдіреді.
Ұзатқанда ата-ана құдасына: «Қызым аманат» деп тапсырған. Қыздың бақыты мен болашағы барған жеріне байланысты өрілетіні аманаттағанынан байқалады. Бірақ, аманатқа қиянат жасаушылардың көбейгені жан ауыртады. Әлеуметтік желіде лифтіде ер адамның әйелін тепкілеп, жұдырықтап ұрып-соққан видеосы тарады. Жәбірленушінің айтуынша, бірнеше адам караокеге барған. Онда А. есімді келіншек күйеубаласымен қосылып ән айтқан. Кеш біткен соң Е. әйелін лифтіде, кейін үйде ұрып-соққан. Осы оқиғадан соң А. есімді келіншек полицияға арызданған. Келіншектің айтуынша, бұл жағдай бұрын да болып жүрген. Күйеуі әрнәрседен айғай-шу шығарады екен. Енесі ұлына ақыл айтудың орнына еркектердің осындай болатыны, әйел отбасын сақтау үшін бәріне шыдау керектігін айтып, келініне бас көтертпей келген. Айта кетері, осы сөзді айтқан әйел бір қалада балалар мен әйелдер құқығын қорғау жөніндегі кеңестің төрайымы. Егер ер адамның ұрып-соққаны бейнекамераға түсіп қалмағанда зорлық-зомбылықты дәлелдеу мүмкін емес еді.
Бұл оқиға тұрмыстық зорлық-зомбылықтың қоғамдағы өзекті мәселелердің бірі екенін дәлелдейді. Қоғамда осындай күй кешіп жүрген әйелдердің бары рас. Тұрмыстық зорлық-зомбылыққа көз жұмып қарамау керек. Ел не дейді деп емес, өз өміріңді сақтауды негізгі орынға қою керек.
Мұндай жағдайларды болдырмау үшін қоғамды тұрмыстық зорлық-зомбылыққа қарсы күреске жұмылдыру керек. Біз, қазіргі жастар, аналар мен балалардың зорлықшылдардан жапа шекпегенін қалаймыз. Зорлық-зомбылық мәселесі әр азаматтың назарына алынып, құқық қорғау мекемелері дер кезінде әділ әрекет етсе ғана осындай оқиғалардың алдын алуға болады.
Жанат Калдыбаева,
ЖУ-дің гуманитарлық ғылымдар жоғары мектебінің студенті
Фото: baq.kz
