Қазақстан университеттерінде жасанды интеллект саласындағы ауқымды AI-Sana бағдарламасы жаңа белеске жетті. Еліміздің 105 жоғары оқу орнында 87 мыңнан астам студент білім алып, экономиканың маңызды салаларына арналған 442 жасанды интеллект шешімін әзірледі, – деп хабарлайды 7-su.kz ақпараттық порталы.
Бағдарламаның алғашқы кезеңінде жасанды интеллект құзыреттерін қалыптастыруға назар аударылса, қазіргі таңда студенттер нақты салалық міндеттерді шешуге кірісті. Әзірленген 442 жоба білім беру, денсаулық сақтау, ауыл шаруашылығы, қаржы және өнеркәсіп бағыттарын қамтиды. Әсіресе, білім беру саласында оқыту сапасын арттыруға және әкімшілік рәсімдерді автоматтандыруға бағытталған 188 шешім дайындалды.
Ең табысты жобалардың қатарында Ұлттық тестілеу орталығының AI-Talapker чат-боты бар. Ол 69 мыңнан астам талапкердің өтінішін өңдеп, мамандарға түсетін жүктемені азайтты. Сонымен қатар, Satbayev University әзірлеген 180 мыңнан астам қолданушысы бар AI-прокторинг жүйесі академиялық адалдықты қамтамасыз етуде. AlmaU университетінің OquLabs платформасы болса, тапсырмаларды тексеруді автоматтандырып, оқу үдерісін жеңілдетті.
Ғылыми қызметте де жаңа бастамалар бар. Әл-Фараби атындағы Қазақ ұлттық университетінде ғылыми өтінімдерді автоматты түрде тексеретін және сараптамалық шешімдерді қолдайтын AI-көмекшілер әзірленуде. Қарағанды индустриялық университетінің Smart Bots, Қостанай өңірлік университетінің AI-Mektep және Оңтүстік Қазақстан университетінің Auezov AI First платформалары білім берудің болашағын айқындап келеді.
Бұл әзірлемелер студенттердің заманауи технологияларды игеріп қана қоймай, практикалық тәжірибе жинақтауына мүмкіндік береді. Университеттер сұранысқа ие өнімдер жасайтын технологиялық орталықтарға айналуда. Алдағы уақытта үздік жобалар акселерациялық бағдарламалар арқылы инвестиция тартып, нарыққа дербес технологиялық өнім ретінде шығуды мақсат етіп отыр.
AI-Sana бағдарламасы ұлттық жасанды интеллект экожүйесін жүйелі түрде қалыптастырып, Қазақстанның цифрлық дамуын жеделдетуде. Студенттердің мұндай бастамалары еліміздің технологиялық болашағының берік іргетасын қалайды. Жасанды интеллект саласындағы тың жаңалықтарды оқи отырып, біліктілік пен инновацияға ұмтылу әрбір жастың міндеті.
