Жетісуда білім мен ізденістің биік үлгісін көрсеткен тағы бір жарқын жетістік тіркелді. Кербұлақ ауданы, Ж. Тобаяқов атындағы орта мектептің оқушысы Айжан Далибаева облыс көлемінде өткен «Ұлттық тарих күні» аясындағы байқауда топ жарып, «Деректі фильм» номинациясы бойынша І орынды иеленді. Байқау Талдықорған қаласындағы №25 жалпы білім беретін орта мектеп базасында ұйымдастырылды.
Жас ұрпақтың тарихи санасын қалыптастырып, ел шежіресін терең тануға жол ашатын маңызды байқауға облыстағы дарынды оқушылар қатысты. Осындай тағылымы мол додада үздік атану тек тынымсыз еңбек етіп, табандылық танытқан білімгердің қолынан ғана келмек.
Айжан дайындаған деректі фильм мазмұнының байлығымен, тарихи нақтылығымен және шығармашылық шешімімен қазылар алқасының жоғары бағасына ие болды. Жас дарынның бұл жетістігі – оның білімге деген құштарлығы мен ізденімпаздығының айқын көрінісі. Тарихқа деген қызығушылығы мен жауапкершілігі оны жаңа белестерге жетелеп, шығармашылық көкжиегін кеңейтіп отыр.
Әр жетістіктің артында ұстаз еңбегі тұратыны белгілі. Айжанның бұл жеңісінде оның жетекшісі, тарих пәнінің мұғалімі Сымбат Құлжабектің еңбегі ерекше. Ұстаздың кәсіби шеберлігі, дұрыс бағыт-бағдары мен қолдауы шәкірттің қабілетін шыңдап, шығармашылық әлеуетін ашуға үлкен ықпал еткен.
Жастардың осындай жетістіктері ел болашағының жарқын екенінің дәлелі. Білім мен ізденісті ту еткен Айжанға алдағы уақытта да толағай табыстар тілейміз.
М. САМАРХАН,
Ж. Тобаяқов атындағы
орта мектептің география
пәнінің мұғалімі
Кербұлақ ауданы
