Талдықорғандағы Ілияс Жансүгіров атындағы Мәдениет сарайында Жетісу облысы әкімінің жүлдесі үшін ұйымдастырылған облыстық XXIV «Жетісу жұлдыздары – 2026» балалар шығармашылығы байқауы мәресіне жетті. Жарысқа 500-ден астам бала қатысты. Оның ішінен 300-ден астам қатысушы облыстық кезеңге жолдама алса, көзге ерекше түскен ең үздік 12 бала ғана гала-концертте өз өнерлерін ұсынды, – деп хабарлайды 7-su.kz ақпараттық порталы.
Қазылар алқасының төрайымы Айгүл Сәбитованың айтуынша, дәстүрлі дода эстрадалық вокал, дәстүрлі ән, хореография және музыкалық аспапта ойнау (жеке орындау) сияқты төрт номинация бойынша және 5-8 жас, 9-11 жас, 12-15 жас аралығындағы үш жас ерекшелігі бойынша ұйымдастырылды. Байқаудың басты мақсаты – балалар шығармашылығын дамыту, музыкалық-эстетикалық тәрбие беру, жас таланттарды қолдап, оларға үлкен сахнаға жол ашу болып табылады. Қазіргі таңда Жетісу облысы бойынша ауылдар мен қалалардағы мәдениет үйлері жанында 867 балалар үйірмесі жұмыс істейді, онда 7700 бала шұғылданады.
Гала-концерт ерекше өтті. Ақсу ауданынан келген Айзере Ерсінжанқызының орындауындағы «Самалтау» әні, Сарқан ауданынан қатысқан Қайырбек Мейрамбектің шырқаған «Ақбұлақ» әні және талдықорғандық «Өрнек» ансамбліндегі қыздардың орыс халық әндерінің желісімен дайындаған «Қош бол, қыс» атты көңілді хореографиялық композициясы залды тәнті етті. Байқау қорытындысы бойынша осы Талдықорған қаласының намысын қорғаған «Өрнек» би ансамблі бас жүлдені алды.
Жарыс жеңімпаздары дипломдармен, ақшалай сертификаттармен марапатталып қоймай, алдағы уақытта «Ақ көгершін», «Ғұмырдария», «Жас қанат» сияқты республикалық және халықаралық шығармашылық байқауларға жолдама алады.
