Бүгін Ақордада Бұқаралық ақпарат құралдары қызметкерлері күніне орай медиа саласы өкілдерін марапаттау рәсімі өтті. Салтанатты жиында Мемлекет басшысы Қасым-Жомарт Тоқаев журналистерді кәсіби мерекесімен құттықтап, сала қызметкерлерінің қоғамдағы рөліне тоқталды, – деп хабарлайды 7-su.kz ақпараттық порталы.
Президент өз сөзінде журналистика саласында әрдайым ұлт мүддесін жоғары қоятын, елдің дамуына үлес қосқан тұлғалар қызмет еткенін атап өтті.
– Олар халықтың сана-сезімін оятып, елдің еңсесін көтеруге зор үлес қосты, ағартушылықпен айналысып, халықты білім мен ғылымға шақырды. Сіздер де аға буын салған сара жолды лайықты жалғастырып келесіздер. Баршаңызға тағы да зор алғыс айтамын, – деді Қасым-Жомарт Тоқаев.
Мемлекет басшысы медиа саласы қызметкерлерін қолдау шаралары жалғасатынын айтты.
– Мемлекет медиа саласы қызметкерлерін әрдайым қолдайды, олардың әлеуметтік жағдайын жақсартуға баса мән береді. Баршаңызға мәлім, жыл сайын кәсіби мереке қарсаңында тілшілер қауымына пәтер кілтін табыстау жақсы дәстүрге айналды. Соңғы үш жылда Астана қаласында ғана 200 журналист баспаналы болды. Енді бұл бастаманың ауқымын кеңейте түсуді көздеп отырмыз. Әсіресе, сапалы хабар таратып, қажырлы қызмет етіп жүрген аймақ тілшілерінің еңбегін елеусіз қалдыруға болмайды деп санаймын. Сондықтан менің тапсырмаммен осы жылы алғаш рет облыстарда жұмыс істейтін журналистерге де пәтер кілті табысталады. Жалпы, биылдың өзінде бүкіл еліміз бойынша ақпарат саласының 66 қызметкеріне баспана беріледі. Бәріңізге құтты болсын деймін! – деді Президент.
