Отандық тауар өндірушілерге қолдау көрсету шеңберінде сатып алу саласындағы жұмыс комиссиясының бірінші отырысы өтті. Жиын облыс әкімінің орынбасары Жеңіс Тұяқов пен Өңірлік кәсіпкерлер палатасының директоры Нариман Әбілшайықовтың төрағалығымен өтті.
Отырыс барысында Талдықорған қаласы мен Қаратал ауданы әкімдіктерінің және құрылыс басқармасының сатып алу саласында кәсіпкерлерді қолдау бойынша атқарған жұмыс қорытындылары тыңдалды. Талдықорған қаласы әкімінің орынбасары Асқар Қожабаев баяндамасында өткен жылы облыс орталығында жалпы сомасы 7 млрд. 123 млн. теңге болатын 2 861 келісімшарт орындалғанын атап өтті. «Сатып алу порталында жергілікті құрам жөніндегі үлгі қате толтырылады немесе мүлде толтырылмайды. Осының салдары жергілікті құрам жөніндегі есептің бұрмалануына әкеп соқтырады», – деді ол. Асқар Рамазанұлының айтуынша, биыл Талдықорғанда 16,5 млрд. теңгеге 2 491 сатып алу жоспарланған, оның ішінде жалпы сомасы 11 млрд. теңгеден асатын 137 сатып алу конкурс түрінде өтпек.
Облыстық құрылыс басқармасы басшысының орынбасары Айбек Нұржанов сатып алудағы қазақстандық құрамның үлесі жоғары екенін жеткізді. «2017 жылы денсаулық сақтау ісі саласында жергілікті бюджет есебінен 17 нысан іске қосылып, қазақстандық құрам үлесі 80 пайызды құрады. Спорт саласында 3 нысан тапсырылған, қазақстандық құрам 75 пайыз, ішкі істер органдарында 90 пайыз, ауылшаруашылығы саласында 90 пайыз, коммуналдық шаруашылық саласында 85 пайызды құрады», – деді Айбек Диасұлы.
Сонымен бірге ол мемлекеттік мекеменің белгілі бір жеткізушінің мүдделерін қолпаштауына жол бермеу қажеттігін айтты. Әріптесінің сөзіне Жеңіс Шылбынұлы: «Біз нақты жеткізуші туралы айтып жатқан жоқпыз. Біз жалпы отандық өндірушілер, жүйе жөнінде сөз қозғап отырмыз. Қазір жыл басы, бәрін түзету керек», – деген жауап қайтарды. Қаратал ауданы әкімінің орынбасары Асқат Қалиасқаров сатып алудағы жергілікті құрамның төмен болуына мемлекеттік сатып алу порталына жергілікті құрам туралы ақпаратты енгізу бойынша жұмыстың өз деңгейінде жүргізілмей отырғаны себеп екенін алға тартты.
Сондай-ақ ол отандық тауар өндірушілерді қолдау мақсатында өткен жылы ауданда инвестфорум өткізіліп, нәтижесінде меморандумға қол қойылғанын жеткізді. Отырыс барысында кәсіпкерлер әкімдікке заңбұзушылық деректеріне назар аударуға шақырды. Баяндамалардың қорытындылары бойынша облыс әкімінің орынбасары аталмыш бұзушылықтарды жойып, көрсеткіштерді жақсарту бойынша шара қолдануды талап етті. Отандық тауар өндірушілерге қолдау көрсету шеңберінде сатып алу саласындағы жұмыс комиссиясы аясында Нариман Бақтыбайұлы «Атамекен» ҚР ҰКП тарапынан сатып алу жүргізуді түбегейлі қайта қарау бойынша атқарылған жұмыс нәтижесімен таныстырды.
Сондай-ақ, ол отырыста айтылған барлық дерек «Атамекен» мен әкімдіктің жіті назарында болатынын атап өтті. Осы саладағы проблемалық сұрақтарды тиімді шешу мақсатында облыстық кәсіпкерлер палатасы және облыс бойынша ішкі мемлекеттік аудит департаменті арасында өзара түсіністік пен әріптестік жөнінде келісімге қол қойылды.
Айта кетейік, отандық тауар өндірушілерге қолдау көрсету шеңберінде сатып алу саласындағы жұмыс комиссиясының отырыстарын Талдықорған қаласында апта сайын өткізіп, онда әкімдіктер мен салалық басқармалардың сатып алу саласы бойынша жұмыстарды тыңдау жоспарланған.
Айгүл БАЙБОСЫНОВА.