Оқи отырыңыз
Алматы облысы бойынша төтенше жағдайлар департаменті Жетісу Алатауындағы Қора, Көксу, Қорғас өзендерінің бастауында орналасқан мұздықтарға аэровизуалды шолу жүргізді.
Департаменттің баспасөз қызметінің хабарлауынша, көшкін қаупі бар және мореналық көлдердің жай-күйін тексеру мақсатындағы шара «Қазселденқорғау» мекемесінің «Жетісу Алатауы өңірлік пайдалану басқармасы» филиалымен бірлесіп ұйымдастырылған.
Аэровизуалды шолу Талдықорған қаласының әуежайынан еурокоптер - ЕС145 тікұшағымен жүргізілген. «Бүгінгі таңда 2 500 метрден астам биіктіктегі таулардың оңтүстік беткейлеріндегі қардың қалыңдығы 30-40 см. Ал солтүстік жағында 1 метрден 1,5 метрге дейін жетеді. Панфилов ауданы аумағындағы қардың қалыңдығы жылдық нормадан аз, су өтімдері таза, транзиттік түрде екені анықталды. Ауа температурасы 2 500 метр биіктікте +3,5 градус болса, 3 400 метрде +1 болып тұр, 3 800 метрде 0-ден 5 градус төмен», - делінген хабарламада.
Тауда қазір гидрологиялық жағдай қалыпты. Сондай-ақ, Кербұлақ ауданы мен Көктал өзені арнасының 7 нүктесінде қар көшкіні түсу деректері тіркелген. Алайда елді мекендерге қауіп жоқ.
"ЖЕТІСУ-АҚПАРАТ"
