Оқи отырыңыз
Англияның Оксфордшир округіндегі Бленхейм сарайында өткен еуропалық саяси қоғамдастық саммитінің негізгі талқылау тақырыбы заңсыз иммиграцияға қарсы күрес болды.
«Біз бандыларды (адам контрабандашылары - ред.) жеңеміз, олардың бизнес үлгісін өзгертеміз және шекарамызды бекітеміз», - деді Ұлыбритания премьер-министрі Кир Стармер баспасөз мәслихатында.
Ол Ұлыбританияның Еуропалық Одақтың Europol полиция қызметімен ынтымақтастығын нығайтып, Словакия, Словения сияқты елдермен көші-қон саласында жаңа ынтымақтастық келісімдерін жасайтынын атап өтті.
«Біз еуропалық серіктестерімізбен бандыларды бизнестен шығару үшін барлау жұмыстарын жүргізетін боламыз», - деп қосты Стармер.
Заңсыз көші-қонның түпкі себебін жою үшін Ұлыбритания премьер-министрі Африка мен Таяу Шығыстағы гуманитарлық және білім беру жобаларын жүзеге асыруға 84 миллион фунт стерлинг бөлетінін хабарлады.
«Бұл гуманитарлық және медициналық қолдауды, біліктілікті арттыруды, жұмысқа орналасуға жәрдемдесуді және білімге қолжетімділікті қамтиды. «Бұл көші-қон дағдарысын еңсерудің маңызды бөлігі», - деді Ұлыбритания үкіметінің басшысы.
Еуропалық саяси қоғамдастықтың саммиті – 2022 жылы Франция президенті Эммануэль Макронның бастамасымен Еуропаның болашағын талқылау үшін құрылған халықаралық форум. Осы төртінші саммитке 35-тен астам мемлекет және үкімет басшылары қатысты.
Келесі саммит қараша айында Венгрияда, ал 2025 жылы Албания мен Данияда өтеді.
Фото: Тимур Дүйсекеев/ Kazinform
