ҚР Парламенті Мәжілісінің депутаты, экология және табиғатты пайдалану мәселелері жөніндегі комитетінің мүшесі Марат Бопазов Ескелді ауданына келген жұмыс сапарында ең алдымен «Нұр Отан» партиясының аудандық филиалының кеңсесіне жиналған аудандық мәслихат депутаттары, мекеме басшылары, аудандық әкімдік пен мәслихат аппаратының өкілдерімен және ауылдық округтер әкімдерімен кездесті.
Жүздесуде «Нұрлы Жол» және «Өңірлерді дамыту – 2020» бағдарламалары аясында атқарылып жатқан жұмыстар тұрғысында біршама әңгіме өрбітті. Атап айтқанда, жыл басынан бері өңірімізде «Бизнестің жол картасы – 2020» бағдарламасы аясында 148 жоба мемлекеттік қолдауға ие болса, инфрақұрылым тарту бойынша 7 жоба жүзеге асырылуда. Үстіміздегі жылы шағын несиелендіруге 9,6 млрд. теңге қарастырылған. Оның ішіндегі «Жұмыспен қамтудың жол картасы – 2020» бағдарламасы бойынша ауылдағы жұмыссыз ағайынның тіршілігін түзетуге бөлінген 5,8 млрд. теңгенің 529,0 млн. теңгесі ғана, яғни 9,1 пайызы ғана игерілген. Халық қалаулысы осындай өзекті мәселеге жер-жерде айрықша назар аудару қажеттігін баса айтты.
Сонымен қатар, Марат Дәрібекұлы өңірімізде барлық бағдарлама аясында 87 млрд. теңгеге 193 жоба жүзеге асырылып жатқанын, шағын және орта бизнесті дамытуға қолдау көрсетілгенін, мұның өзі облыс экономикасына оң серпін бергендігін тілге тиек етті.
Халық қалаулысымен бірге тұрғындармен кездесуге келген «Нұр Отан» партиясы облыстық филиалы төрағасының бірінші орынбасары Ғалиасқар Сарыбаев та жоғарыда аталған жобаларды жүзеге асырудың маңыздылығына кеңінен тоқталды. Елбасының алға қойған «100 нақты қадамын» жүзеге асыру арқылы дамыған 30 елдің қатарына енуге жол ашылатынына баса назар аударды. Осы орайда атқарылған істердің барысын алға тартты. Сондай-ақ, ол Тәуелсіздігіміздің 25 жылдығы мерейтойына тыңғылықты әзірлікпен бару, қоғамның саяси ахуалын сақтау және жер мәселесі тұрғысында да біраз ой-толғамын білдірді.
Кездесуді жүргізген аудан әкімі Жұбаныш Ноғайбеков жоғарыда аталған бағдарламалар негізінде біраз істер атқарылғандығын, ал алдағы күндердің міндеттері одан да ауқымды екенін айта келіп, оның жүзеге асырылуы назарда болатындығын және тиісінше қолдау-көмек көрсетілетіндігін атап өтті. Соның қатарында аудан орталығында салынатын 320 орынды балабақшаның жобалық құжаттары дайын екендігін, ендігі кезеңде соны салуға едәуір қомақты қаржының қажеттілігін депутаттың назарына сала келіп, Марат Дәрібекұлына депутаттық қызметінде сәттілік тіледі. Бұдан соң Мәжіліс депутаты бірер адамдарды жеке мәселелері бойынша қабылдап, олардың өтініш-тілектерін тыңдады.
Ал түс ауа Марат Бопазов Қаратал өзеніндегі ГЭС-тің жұмысымен және Текелі қаласының маңындағы Қора шатқалында жүргізіліп жатқан жобалық құны 6,2 млрд. теңгені құрайтын «Қора» гидроэлектр стансысының құрылысымен танысып, сол жерде жұмысшылармен тілдесті. Әңгіме барысында пайдалануға берілген кезде 28,5 МВт. энергия қуатын беруге мүмкіндігі болатын бұл алып құрылыста қазір жүзден астам адамның еңбек етіп жатқанын және «Нұрлы Жол» бағдарламасы бойынша осы стансыны салуға 2 млрд. теңге бөлінгендігі жайлы сөз қозғалды.
Шора БАТЫРБАЕВ.
Ескелді ауданы.