Осыдан тұп-тура 3 жыл бұрын облыс орталығы мен Балпық би кентінің арасын, нақтырақ айтқанда, 24 шақырым жолды (235-259 км.) қайта жаңарту жұмысы басталды. Осылайша, тапсырыс беруші мен мердігер компания «Корпорация Прогресс» ЖШС-нің арасындағы жөндеу туралы келісімшарт 2013 жылдың қыркүйегінде жасалып, жұмыс құны 7,592 млрд. теңгеге бағаланған болатын. Осы ретте мемлекеттік бағдарламалардың қарқынды түрде іске асырылуын қамтамасыз ету мақсатында «Нұр Отан» партиясы облыстық филиалы мен депутаттар корпусының өкілдері жасалып жатқан жолдың қазіргі жағдайымен танысып қайтты.
Кемшілік жоқ емес. Ол туралы «Нұр Отан» партиясы облыстық филиалы төрағасының бірінші орынбасары Ғалиасқар Сарыбаев айтып берді. Әрі осы жол жайында қарапайым халық тарапынан түскен арыз-тілектің де аз еместігін жеткізді. Мәселен, биылғы жылы жол құрылысына жоспарланған қаражаттың 3,055 млрд. теңгесі бөлінсе де, осы аралық әлі күнге дейін жүргіншілер үшін қиындық туғызып келеді.
Бұл туралы «КазАвтоЖол» АҚ-ның облыстық филиалы директорының орынбасары Болатбек Айтбаев: «Алғашында жұмыс 2015 жылы аяқталуы тиіс еді, бірқатар себептерге байланысты мерзім 2016 жылдың желтоқсан айына дейін ұзартылып отыр. Сонымен қатар, елді мекен тұрғындары жолды жөндеу жұмысына келісімдерін бермеді. Себебі, жолды басып өтетін кейбір аймақтар сол жолдың бойында орналасқан үйлердің иесіне тиесілі. Мұндай жағдайда шағын аумақтарды тек сатып алып қана жөндеу жүргізуге болады. Тиісінше жол жөндеу жұмысы басқаша жобаланатын болды. Жоба қазір шамамен 50 күнге созылатын мемлекеттік сараптамадан өткізілуде. Қолайлы шешім табылғаннан кейін жұмыс жалғасатын болады. 2016 жылдың желтоқсан айына дейін транзиттік тасымалдау қозғалысы асфальт-бетон төселген бір жолақты жолмен іске асады, – деп мәлімдеді.
Сондай-ақ, кейбір аймақтарда Балпық би мен Бақтыбай кентін сумен қамтамасыз етіп отырған құрылымдар бар (шағын көпірлер, су құбырлары). Қазір мердігерлер 25 су құбырын жөндеу жұмысын аяқтады. Ал Теректі ауылы мен Талдықорған қаласы аралығын жалғайтын жалпы жол құрылысы келесі жылдың аяғында толық аяқталмақ.
Мердігер компания өкілдерінің сөзін тыңдап, алдағы нақты жоспарларға назар аударған Ғалиасқар Төлендіұлы жол жасаудағы бірқатар кемшіліктерді атап өтіп, алдағы уақытта олқылықтардың орнын толтыруды тапсырды.
– «Нұр Отан» партиясы өз кезегінде мемлекеттік маңызы бар бұл жобаны қатаң бақылауда ұстайтын болады. Бұл үшін бізде арнайы комиссия жасақталды, – дейді «Нұр Отан» партиясы облыстық филиалы төрағасының бірінші орынбасары.
Сол күні «нұротандықтар» Көксу ауданындағы шаруа қожалықтарында болып, олармен еменжарқын әңгімелесті.
Қ. ӘБДІҒАПАР.