Жаңа оқу жылының басталуына аздаған уақыт қалды. Мектептердің оған даярлығын пысықтау күн тәртібіндегі мәселе. Осыған орай Талдықорған қаласы әкімінің орынбасары Марлен Көлбаев, білім бөлімінің басшысы Болат Тұрысбеков және бірқатар депутаттар күрделі жөндеу жұмысы жүргізіліп жатқан білім шаңырақтарында болды.
Депутаттар алғашқы кезекте Көктал ауылындағы Е. Берліқожа атындағы №11 орта мектептің құрылыс жұмысымен танысты. Толықтай күрделі жөндеуден өткізіліп жатқан 1161 оқушы білім алатын мектепте құрылыс жұмысы қызу жүруде. Ол үшін 150 құрылысшы еңбектеніп, білім шаңырағын мерзімінен кешіктірмей тапсыруға барын салуда. Бүгінгі күні мектептің шатыры жабылып, есік-терезелері орнатылуда. Электр сымдары тартылып, жылыту жүйесін жүргізу аяқталуда. Енді левкас жүргізу, линолеум салу, сырлау жұмыстары күтіп тұр.
Жалпы білім шаңырағының күрделі жөндеуіне жергілікті бюджеттен 272 млн. теңге қарастырылған. Оған қосымша материалдық-техникалық базаны нығайтуға 20 млн. теңге бөлінген. Бұл қаржыға мәжіліс залының орындықтары, спортзалға қажетті толық құрал-саймандар алынып, педагогика және психология кабинеті, ұлдарға арналған шеберхана темір және ағаш өңдеу құрылғыларымен жабдықталмақ. Ал қыздарға арналған технология, химия, физика, биология кабинеттері жаңа модификация бойынша өткен жылы жасақталған болатын.
1982 жылы салынған аталмыш білім шаңырағының әбден тозығы жеткен еді. Содан бері бірде-бір рет жөндеу көрмеген мектептің шатырынан су өтіп, едені қисайып, есік-терезелері ескірген. Бүгінгі таңда қабырғалары пеноплекспен қапталып, жылылануда. Құрылыс жұмысын «BMNK» сервис» ЖШС жүргізуде. Мектеп құрылысына жауапты мердігер Торғайбек Мырзайымханов жөндеу жұмысы тамыздың 25-іне дейін аяқталатынына уәде беріп отыр.
– Мектебіміздің толықтай жаңалануы көңілімізге қуаныш ұялатады. Тұрғындардың да жылы лебізін естіп жатырмыз. Ауылға көрік беріп тұрған мәдениет ошағы – осы мектеп. Барлық іс-шаралар осында өтеді. Ең бастысы, жаңарған мектеп жас жеткіншектерімізді білім алуға бұрынғыдан бетер құлшындыра түсіп, жаңа оқу жылына ерекше күш-жігермен келуіне септігін тигізеді, – деді бізбен қуанышын бөліскен мектеп директоры Қайрат Сарқытов.
Қалада күрделі жөндеу жұмысынан өтіп жатқан екінші нысан №42 балабақша. Балдырғандар мекені де 1983 жылы салынған. Содан бері тоқтаусыз бүлдіршіндердің игілігі үшін қызмет етіп келеді. Тек ғимараттың тозығы жетіп, әбден ескірген. Есіктері дұрыс жабылмайды, терезелерінен жел соғады. Жылыту жүйесі де ескірген. Электр тогы жиі істен шығып қалады. Бұл ғимаратқа да толықтай жөндеу жұмысы жүргізіліп, шатыр, еден, су құбыры жүйесі ауыстырылуда. Құрылыс жұмысын «Ютком» ЖШС жүргізуде. Балабақшаны күрделі жөндеуден өткізуге 180 млн. теңге қаржы бөлінген. Ал материалдық-техникалық базаны жақсартуға 20 млн. теңге қарастырылған.
– Бұл қаржыға толықтай балабақша жиһаздарын сатып ала алмаймыз. Сондықтан тозығы жеткен мүліктерді жартылай ауыстырып, қажетке жарайтындарын қайта өңдеу, жөндеуден өткізбекпіз. Ең қажетті деген заттарды сатып аламыз. Қаржының басым бөлігі бейнебақылау қондырғыларын алуға жұмсалмақ. Бұрын бейнебақылау жүйесі мүлде болмаған. Бүгінгі талапқа сай болсын деп балабақшаға толықтай бейнебақылау қондырғыларын орнатпақпыз, – дейді балалбақша меңгерушісі Гүлниса Тұлымшақова.
Бұдан кейінгі уақытта бүлдіршіндердің де жаңарған балабақшада тәрбие алатындығы қуантады. Тек құрылыс жұмыстарының мерзімінен сәл кешіктіріліп жатқандығы депутаттарды да алаңдатуда. Сондықтан құрылыс жұмысын қарқындатып, балабақшаны жаңа оқу жылына дейін аяқтау қажеттігі тапсырылды.
Алма ЕСЕНБАЕВА.