Қазақстан Республикасының Мемлекеттік қызмет істері министрлігінің облыс бойынша департаментінің ұйымдастыруымен Талдықорған қаласының «Жастар» саябағында бірнеше мемлекеттік мекеме қызметкерлері тұрғындарды ашық әңгімеге тартып, өз салаларындағы жаңалықтар мен мүмкіндіктер жайлы түсінік жұмыстарын жүргізді.
Атап айтар болсақ: «Тұрғынүйқұрылысжинақбанкі», облыстық кәсіпкерлік және индустриялық-иновациялық даму басқармасы, облыстық білім басқармасы, «Бірыңғай жинақтаушы зейнетақы қоры» және халыққа қызмет көрсету орталығының мамандары арлы-берлі өткен қала тұғындары мен қонақтарын толғандырып жүрген сұрақтарға жауап беріп, өз мекемелерінің халыққа жақын екендіктерін танытты. «Ашық мемлекет» атты жаңа форматтағы халықпен жүздесуде тек қана ақпарат беріп қоймай, жаһанданудың жаңа мүмкіндіктерін оңтайлы пайдаланудың әдіс-тәсілдерін де үйретті. Мысалы, «Электронды үкімет» арқылы үйде отырып-ақ мекенжай анықтамасын сайт арқылы алуға болатыны, баланы балабақшаға кезекке қою, айыппұлдардың сомасын анықтап қана қоймай, банк карточкасы арқылы оны төлеудің жолдары және су, жарық сынды коммуналдық қызметтердің де ақысын кезекке тұрып, уақыт жоғалтпай тез әрі жылдам өтеуге болатыны туралы мағлұматқа қанықтық.
Жұрттың алғысына бөленген мекемелер қызметкерлері осындай іс-шаралар жұмысты жүйелі етіп қана қоймай, халықтың сенімін ақтап, олармен тығыз қарым-қатынас орнататынын айтты.
Мәулен Әнербай.