Ақылына көркі сай қаракөз қарындастарымыз сан сынақтан сүрінбей өтіп, ақтық кезеңде бақ сынасты. Ілияс Жансүгіров атындағы Мәдениет сарайында өткен «Талдықорған аруы» байқауының нәтижесінде Аруна Сағатбекова топ жарып, жүзден жүйрік шықты.
Тәуелсіздігіміздің 25 жылдығы аясында ұйымдастырылған шарада бас-аяғы 14 ару сахна төріне Көк туымызды желбірете шығып, ата дәстүр бойынша сәлемдесті. Әрмен қарай сахнада жүру, өзін ұстау шеберлігі сыналды. Үшінші кезеңде қыздардың көйлек таңдау талғамы ескерілсе, 4-кезеңде белгілі дизайнерлердің көйлектерін көрсетуі назарға алынды. Сондай-ақ, көрермендерге концерттік бағдарлама ұсынылып, өнерпаздар кеш көркін еселей түсті. «Талдықорған аруы – 2015» атанған Айдана Қанайбаева да арнайы келіп, әділқазылар алқасына мүшелік етті. Ал, «Талдықорған аруы – 2016» атанған Аруна Сағатбекова Ломоносов атындағы №5 орта мектептің 11-сынып оқушысы. Жасы небәрі 16-да болса да көркімен көпшілікті тамсандырып, жеңіс тұғырынан табылды. Өзге де қатысушылар әртүрлі номинация бойынша марапатталып, Мақтау қағаздарына ие болды. Айкүнім Мұқашева «Ажарлы ару», Айым Серікбай «Парасатты ару», Диана Қанабек «Әсемдік аруы» және тағы да сол сияқты баршасының болмысына сай осындай айдар тағылды.
Осымен 7-рет өткізіліп отырған байқау өзінше ерекшелігімен айқындалды. Себебі, бүгінгі доданың басты сыйлығына ие болған ару – Айсұлу Мұхамадиева. Неге дейсіз ғой, оған Айдын Кәрімов есімді жігіт сахнаға шығып, дүйім халықтың көзінше ұсыныс жасап, қыз келісімін алды. Гүл шоқтарын құшқан ару қуаныштың көз жасын да жасырып қалмады.
Ендігі кезекте Аруна Сағатбекова «Қазақстан аруы – 2016» ұлттық байқауында біздің қаланың намысын қорғайтын болады. Жеңімпазға қолдау көрсетіп, сәттілік серік болсын деп тарқасты жұртшылық.
Мәулен Әнербай