Оқи отырыңыз
«Жетісу-медиа» алаңында Алматы облыстық жұмыспен қамту және әлеуметтік бағдарламалар басқармасы басшысының орынбасары Бақыт Жақсыбаева брифинг өткізді.
Коронавирусты инфекцияның таралуына қарсы іс-қимыл шаралары аясында қазақстандықтардың қауіпсіздігін қамтамасыз ету мақсатында елімізде төтенше жағдай жарияланғаны белгілі. Шара – облыс кәсіпорындарында толық емес жұмыс күнін енгізу, кәсіпорындарды ішін ара жабу, штаттарды қысқарту сияқты көріністермен жалғасуы мүмкін.
Қазақстан Республикасы «Халықты жұмыспен қамту туралы» Заңына сәйкес, жұмыс берушілер алдағы уақытта жұмыстан босатылатын қызметкерлер туралы мәліметті жұмыспен қамту орталықтарына қысқартудан 1 ай бұрын беруі тиіс.
– Жыл басынан бері облыс бойынша жұмысшылардың саны 696 адамды құрайтын 4 кәсіпорын 103 адамды қысқартты. Қазіргі уақытта қысқартылған тұлғаларды жұмысқа орналастыру және оларды жұмыспен қамту бойынша іс-шаралар атқарылуда, – деді Бақыт Тоқтарқызы.
Облыстық комиссияның отырысында ҚР еңбек заңнамасын бұзатын, жалақы бойынша берешектері бар, еңбек қауіпсіздігі және еңбекті қорғау, қызметкерлерді жұмыстан босату жағдайлары бойынша мәселе қаралып, жұмыс берушілер тыңдалған еді. Ағымдағы жылдың 1 қаңтарынан облыс бойынша әкімдіктер, кәсіпорын басшылары мен кәсіподақтар арасында өндірістік үдерістерді тұрақтандыру және жұмыс орындарын сақтау бойынша қызметкерлердің жалпы саны 129 мыңнан асатын 10952 кәсіпорынмен ынтымақтастық туралы меморандумға қол қойылған еді.
Спикердің айтуынша, жұмыспен қамтуды қамтамасыз ету картасы шеңберінде инфрақұрылымды және тұрғын үй-коммуналдық шаруашылықты дамыту есебінен әлеуметтік-мәдени нысандарды күрделі және ағымдағы жөндеу, елдімекендерді абаттандыру (жарықтандыру және көгалдандыру) инженерлік-көлік инфрақұрылымын және тұрғын үй-коммуналдық шаруашылық нысандарын күрделі, орташа және ағымдағы жөндеу сияқты жобаларда жүзеге асыру жоспарлануда.
Баспасөз мәслихаты барысында журналистер азаматтарды толық жұмыспен қамту барысында қандай бағдарламалар қабылданғаны жөнінде сұрады. Спикер азаматтардың толық жұмыспен қамтылуын қамтамасыз ету үшін нәтижелі жұмыспен қамту және кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасының әлеуеті толық пайдаланылатынын айтты. Сондай-ақ, Бақыт Тоқтарқызы халықтың әлеуметтік жағынан осал топтар, атап айтқанда аз қамтылған және көпбалалы отбасылардан шыққан жұмыссыздар үшін бірқатар өзгеріс енгізілетінін айтты.
Олар үшін шағын несие 6 пайыз емес, 4 пайызбен беріледі. Бағдарлама аясында ақысыз және қайтарымсыз гранттар беріледі. Көпбалалы отбасылардан шыққан жұмыссыздар үшін өзгерістер енгізіледі. Оларға «Бастау-бизнес» жобасы бойынша кәсіпкерлік негіздеріне оқыту бойынша айлық курстардан өтпей-ақ гранттар берілетін болады.
– Қысқарту шикізаттың сырттан келмеуіне байланысты орын алуы мүмкін. Ондай жағдай бола қалғанда, арнайы бағдарламалар негізінде жұмыссыз қалғандар еңбекпен қамтылады, – деді спикер сөзінің қорытындысында.
Гүлжан ТҰРСЫН
Алматы облысы
Сурет ғаламтордан алынды
