Алматы облысының қоғамдық-саяси, әлеуметтік-экономикалық газеті

"КАРАНТИН КҮШЕЙТІЛДІ": ТАЛДЫҚОРҒАННЫҢ БАС САНИТАРЫ ЖАҢА ҚАУЛЫ ШЫҒАРДЫ

Уақыты: 26.05.2020
Оқылды: 495

Талдықорғанда соңғы бір аптада коронавирус жұқтырғандар саны елуден асып кетті. Осыған байланысты Талдықорған қаласының бас санитариялық дәрігері Ермек Әсімқұлов карантиндік шараларды күшейтетін Қаулы шығарды. Онда карантиндік шаралардың әлі де жалғасатыны, еш жеңілдетілмейтіні белгілі болды. Бұл жайында "Taldykorgan-online.kz" жазды.

Қаулыға сәйкес, қаланың кіреберістеріне қойылған 4 санитарлық бекеттің жұмысы күшейеді. Арнайы рұқсаты бар көліктерді есепке алмағанда, бей-берекет қаладан шығуға және кіруге тыйым салынады. Қоғамдық орындар, балалар алаңқайы, тротуарлар, көшелер күнделікті залалсыздандырылуы тиіс.

Жәрмеңкелердің, азық-түлік базарларының, киім-кешек базарларының, сондай-ақ, автокөлік базарының жұмысы тоқтатылады. Карантиндік аймақ полиция және әскерилер күшімен тексеріліп тұрады. 20-00-ден кейін қала ішіндегі қозғалысқа тыйым салынады. Банктер мен халыққа қызмет көрсету орталықтары адам көп жиналмас үшін электронды кезекпен немесе алдын ала жазылып жұмыс атқарады. Саябақ, сквер, жағалау сынды демалыс орындарында серуендеуге тыйым салынады. Бетперде тағып жүру - міндет.

Автобөлшек, тұрмыстық техника, тұрмыстық химия сынды азық-түліктік емес тауарлар сататын дүкендер жұмысы сағат 10-00 мен 17-00 аралығында барлық санитарлық талаптарды сақтай отырып жұмыс істейді. Көлік жөндеу орталықтары, дөңгелек жөндеу орындары да қатаң санитарлық талаптарды сақтай отырып жұмысын жалғастырады. Шаштараздар, сән салондары сағат 10-00 мен 18-00 аралығында қызмет атқарады.

Арнайы рұқсат берілгендерден басқа барлық ұйымдар мен мекемелер әдеттегі жұмыс режимін тоқтатуы тиіс. Мүмкіндігі болса, жұмысты қашықтан не онлайн атқарған жөн.

"ЖЕТІСУ-АҚПАРАТ"