Оқи отырыңыз
Қазақстан Республикасы Парламенті Мәжілісінің депутаттары Әлия Әбсеметова мен Данияр Әлімбаев Жамбыл ауданының бірнеше ауылын аралады. Депутаттармен аудан әкімі Нұрлан Ертас, «Нұр Отан» партиясы аудандық филиалы төрағасының бірінші орынбасары Ықылас Амалбек бірге жүрді. Бұл туралы "Жетісу" газетінің тілшісі хабарлады.
Халық қалаулылары алдымен Жамбыл ауылындағы ақын ескерткішіне гүл шоқтарын қойды. Сондай-ақ, осындағы композитор Нұрғиса Тілендиевтің ескерткіш-кесенесінде құран бағыштатты. Музей ішін аралап, биыл туғанына 175 жыл толып отырған жыр алыбынан қалған құнды жәдігерлермен танысты. Музейдің шағын конференц-залында ауыл ақсақалдарымен, ақ жаулықты аналармен сұхбаттасты.
Өзі осы ауданның тұрғыны, осыннан депутаттыққа сайланған Әлия Маратқызы сөзінің басын үлкен іске кірісер алдында өзі үнемі Жамбыл баба басына тәу етіп келетінінен бастап, сайлаушылар үмітін ақтауға барынша тырысатынына сендірді. Парламенттегі Әлеуметтік мәселелер жөніндегі комитеттің мүшесі депутаттар құрамы жаңарғанын, өңірдегі өзекті мәселелерді қозғау, елді мекендерді дамыту, ана мен бала жағдайын жақсартуғатоқталып, жамбылдықтардың ұсыныс-тілегін тыңдады.
Кездесуде ауыл ақсақалы Бақыт Балайұлы тұрғындардың тыныс-тіршілігінен хабардар етіп, халық қалаулыларының жұмысына сәттілік тіледі. Одан кейін депутаттар Қарасу ауылдық округіне қарасты Сарыбай би ауылында дәрігерлік амбулаторияның ішін аралап көріп, дәрігерлермен тілдесті. Жалпы құны 297 миллион теңгелік емдеу орны «Жол картасы» аясында салынып, жуырда пайдалануға берілген. Заманауи медициналық құралдармен жабдықталған медициналық мекемебір ауысымда 25 келушіні қабылдауға арналған. Мұнда бір жоғары білімді дәрігер, 6 медбике, акушер және фельдшер жұмыс істейді.Емдеу мекемесінде ауылдық округтегі 4 елдімекеннің 6 мыңнан астам тұрғынына медициналық қызмет көрсетіледі.
Мәжіліс депутаттары аудан орталығында Жамбыл атындағы Ұзынағаш кәсіптік колледжінде ұстаздармен кездесті. Оқу орнында кейінгі жылдары жүзеге асырылған айтарлықтай оң өзгерістер мен алдағы жобалар туралы аудан әкімі Нұрлан Ертасұлы қысқаша хабардар етіп, жұмысымен тереңірек колледж директоры Болат Алтаев таныстырды.
Мекеменің жетістігіне сүйсінген депутаттар азаматтық қорғаныс, қауіпсіздік, экологиялық сауаттылыққа баулу, тәрбие мәселелеріне мән беріп, алғашқы әскери даярлық пәнінің мұғалімі Мереке Жұмагерейді тыңдады. Негізінен жас ұстаздар жиналған басқосуда аудандағы жастар жайы сұралып, бұл туралы жаңарған жергілікті мәслихатқа сайланған жас депутаттар – аудандық жастар ресурстық орталығының жетекшісі Балжан Досалы мен кәсіпкер Айдын Жүнісов ой-пікірлерімен бөлісті. Мәжілісмендер оқуға қабылдау комиссиясының жұмысын жүргізіп отырған қызметкерлерден биыл қандай мамандыққа құжат тапсырушылар көбірек екенін сұрап білді.
Депутаттар Қарғалы ауылындағы №3 орта мектептің басшылығымен және тұрғындармен кездесіп, елді мекеннің шешілмеген мәселелеріне назар аударды. Осы ауылда Қарғалы өзенінің бойында салына бастаған су электр стансасы құрылысының барысымен танысты. «Биаш-Транс» жауапкершілігі шектеулі серіктестігінің жобалық құны 1 млрд.262 млн.теңге, жылдық қуаттылығы 3 мегаватт су электр стансасы іске қосылғандамұнда 10 адам жұмыспен қамтылады. Құрал-жабдықтары австриялық озық үлгіде болмақ. Осы жылы пайдалануға беру жоспарланған жоба жергілікті атқарушы органдардың қолдауымен жүзеге асырылуда.
Серік САТЫБАЛДИЕВ
Жамбыл ауданы
Алматы облысы
