Мемлекеттің даму қарқынын бәсеңдететін келеңсіз құбылыстың бірі – сыбайлас жемқорлық. Бүгінгі күні бұл тек жекелеген мемлекетке ғана емес, барлық әлем жұртшылығына ортақ мәселеге айналды. Соған орай алдын алу мен болдырмау жолында көптеген түсіндіру жұмыстары жүргізіліп келеді. Мұндай шаралар Елбасының қатаң бақылауында.
Расымен де ұлттың тамырына балта шабар жегіқұрт кімді болса да алаңдатары хақ. Осыған байланысты Талдықорған қаласы Тіл сарайының мәжіліс залында «Сыбайлас жемқорлыққа қарсы мәдениет – мемлекеттік мүлікті басқару тиімділігін қамтамасыз ету, мемлекеттің әлеуметтік-мәдени функцияларын іске асыру негіздерінің бірі» атты облыстық деңгейдегі конференция өтті. Қазақстан Республикасы Мемлекеттік қызмет істері министрлігінің облыс бойынша департаментінің ұйымдастыруымен қолға алынған жиынға облыстық білім, денсаулық сақтау, қаржы, жұмыспен қамту және әлеуметтік бағдарламалар мен мәдениет басқармалары, сондай-ақ, «Азаматтарға арналған үкімет» мемлекеттік корпорациясы КЕ АҚ, мүлік және жекешелендіру департаменті мен ХҚКО филиалдарының жетекшілері қатысты.
– Басқармада және облыстағы барлық білім беру ұйымдарында сенім телефондары мен жәшіктері жұмыс жасап келеді. Бүгінгі күнде басқарма басшысының атына барлығы 54 өтініш келіп түсті, оның ішінде сегізі заңды тұлға, қырық алтысы жеке тұлғалардан. Өтініштерге дер кезінде жауап беру, көрсетілген мәселелерге қатысты нақты шешімдер шығару қатаң қадағалауға алынды, – деді конференцияда сөз алған облыстық білім басқармасы басшысының орынбасары Гүлсара Исағұлова.
Жиында квазимемлекеттік секторда сыбайлас жемқорлықтың алдын алу, мемлекеттік мүлікті басқару және мемлекеттің әлеуметтік-мәдени функцияларын іске асыру ашықтығын қамтамасыз ету мәселелері қаралды. Ұсыныстар мен сауалдарға жауап беріліп, жемқорлыққа қарсы мәдениетті қалыптастыру жолындағы іс-шаралардың нәтижесі әңгіме өзегіне айналды. Конференция барысында мемлекеттік қызметкерлер болашақта да осы бағытта бірлесе жұмыс атқара береміз деген ортақ шешімге келді.