Әр адам өз тағдырының сәулетшісі деген тәмсіл бар. Сонымен бірге өзге жұрттың өмірін сәулеттендіріп жүретін жандар болады. Бүгінгі біздің әңгімеміздің өзегі болып отырған Шәбден Ноғайбаев тура және жанама мағынасында да осындай сәулетші десек, ақиқаттан алыс кете қоймаған болар едік.
Ол 1941 жылдың тамылжығын тамызында Еңбекшіқазақ ауданына қарасты Түрген ауылында дүниеге келген. Бұл халыққа қасірет сыйлаған соғыстың басталған тұсы болатын. Әкесі Жүніс ауылдың ұстасы болып еңбек етіп жүрген жерінен алғашқылардың бірі болып майданға аттанады. Өкінішке орай, адамдарды аждаһадай жалмаған қанды қасап оны да аман қалдырмаған. Көп ұзамай Ленинград түбінде жаумен кескілескен ұрыста ерлікпен қаза тапты деген қаралы қағаз қайғы арқалап жеткен болатын. Артында қалған екі ұлы – Әбен мен Шәбденді бауырына басқан анасы Нағима бар-жоғы 30 жасында жесір атанып, тағдырмен бетпе-бет қалған. Жалғыз өзіне балаларды көтеру ауырға соққаннан кейін ағайындарын сағалап Қарқараға көшкені де осы тұс.
Майдан даласында жауынгерлер сәт сайын ажалмен арпалысып жүрсе, ауылдағылар үшін де оңай болмаған. Жүріп-тұруға шамасы келетін кәрі мен жас еңбек майданына түгелдей қамтылған еді. Нағима да таңның атысынан күннің батысына дейін ұжымшардың жұмысында болып, қас қарайғанда үйге оралушы еді. Сөйте жүріп үлкен ұлы Әбеннің дертке шалдыққанын да дер кезінде аңғармай қалған сияқты. Күйеуінен қаралы қағаз келіп, қайғы жұтып отырғанда үлкен ұлынан айырылу ана үшін оңай болмағаны ақиқат. Ендігі жерде қалайда Шәбденді аман-есен жеткізу қажет. Енді ол барлық аналық махаббатын жалғыз ұлының болашағына арнаған.
Шәбден кішкене кезінен өте пысық әрі алғыр болып өседі. Ауылдағы жетіжылдық мектепті үздік бітіргеннен кейін аудан орталығы Жалаңашқа аттанғанда Нағима анасы ұлының қалайда оқуын жалғастыруын қалағаны да сондықтан. Шәбденнің болашағынан үлкен үміт күткен ол жалғызын аттандырып тұрып, жақсы оқып, азамат болуын қайта-қайта тапсырған болатын. Жалаңаштағы жалғыз интернат қазақ мектебінде оқитындарға арналғандықтан орыс сыныбын бітірген Шәбден үшін мұнда орын болмай шықты. Басқа барар туыс-туған болмағандықтан Шәбден біраз күн мектеп жанындағы алма бағына қонып жүрді. Анасы берген жалғыз ескі көрпені таңертең талға іліп кетеді де кеш түсе сол көрпенің жартысын астына салып, жартысын жамылып ұйқыға кетеді. Ауылға қайтып кетейін десе анасының айтқан аманаты жадында. Жас жеткіншектің оқуға деген құштарлығы мен қайсарлығын көрген мектеп директоры ақыры оның интернатқа орналасуына көмектескен. Шәбден қамқор ағалардың үмітін алдаған жоқ. 1960 жылы бүкіл аудан бойынша Алтын медальға үміткер 5-6 түлектің ішінен сол ғана өз білімін дәлелдеп шығып, мектепті үздік бітірген болатын.
Бұл елдің енді ғана есін жия бастаған кезі еді. Мектеп бітірген жастар бірден оқуға бара алмайды. Ол үшін екі жыл міндетті түрде еңбек етуің қажет. Сондықтан Шәбден анасына қамқор болу үшін Құмтекейдегі №50 жылқы зауытына ағаш ұстасы болып жұмысқа орналасады. Ол осы жерде білімге ғана емес, кәсіпке де бейімі бар бала екенін аңғартқан. Бір-екі жылдың ішінде қатардағы жұмысшыдан алдымен бригада басшысы, соңынан шебер лауазымына дейін көтеріліп, зауыт жетекшілерінің алғысына бөленгені белгілі. Сондықтан болар, үш жыл еңбек еткеннен кейін оған Алматыдағы ауылшаруашылық институтының механика факультетіне жолдама береді. Алайда құрылысшы мамандығын меңгеремін деген жас құжаттарын политехникалық институттың құрылыс факультетіне тапсырады.
Өзінің біліміне сенген Шәбден үш емтиханның екеуін беске, біреуін төртке тапсырып, алаңсыз жүрген болатын. Алайда бұл жерде де оны әділетсіздік күтіп тұрыпты. 12 балл жинағандар оқуға қабылданып жатқанда, 14 балл алған ол студенттердің тізімінде жоқ болып шықты. Оның себебін білуге ректорға кірсе, қателік кеткенін мойындаған институт басшысы келесі жылы міндетті түрде түсетінін айтып, шығарып салады. Өзге біреу болса жүгін арқалап ауылына қайтар ма еді?! Алайда, өмірдің өзі шыңдаған Шәбден Білім министрінің қабылдауына барып, әкесінің соғыста қайтыс болғанын, жалғыз анасының аманатын орындау үшін оқуға келсе, мұнда оған қиянат жасалынып отырғанын айтып, шағымданады. Нақтылы не деп айтқаны есінде қалмапты, алайда министр ректорға қатты-қатты ұрысқаны есінде. Жігер-күшінің арқасында оқуға қабылдандым деп жүрген Шәбден бұл жерде де құйтырқы әрекет барын кейін стипендия алар кезде білген. Сөйтсе оны «студенттікке кандидат» деген атаумен орналастырған екен-ау. Ал анасының жағдайын білетін Шәбден стипендиясыз оқу қиынға соғатынын айтып, ректордың алдына қайта барады. Одан оңай құтылмайтынын білетін ректор шаруашылық жөніндегі орынбасарын шақырып алып, бу қазандығын жағушыға көмекші ретінде жұмысқа орналастырып, жалақысын уақытылы төлеп тұруын тапсырған болатын. Кеш түсе қазандыққа барып, таңертеңге дейін жұмыс жасай жүріп, Шәбден жарты жылдың ішінде озат білімгер болып қоғамдық жұмыстарға белсене араласа бастайды. Алғашқы сессиясын кілең беске тапсырғаннан кейін ол толыққанды студент атанып, стипендияға да ие болған. Ал бірінші курсты үздік тамамдаған оны басшылық Мәскеудегі Куйбышев атындағы инженерлік-құрылыс институтына жолдап, сол кездегі алып Отанымыздың астанасында білімін жалғастыруға мүмкіндік жасайды.
Мәскеу институтын қызыл дипломға бітірген алғыр жасты жолдамамен өзі оқыған жоғары оқу орнына мұғалім етіп жіберген болатын. Алған білімін ғылыммен ұштастырамын деген Шәбден мұнда да кедергіге ұшырасады. Кафедра меңгерушісі өрекпіп тұрған жастың аптығын басқысы келіп, қайта-қайта аяқтан шала берген. Бұлай жұмыс жасау қиынға соғатынын түсінген Шәбден мемлекеттік жоспарлау комитетіне барып, өндіріске жіберулеріне өтініш жасайды. Бұл мамандардың қай салада да тапшы кезі емес пе. Оны бірден жаңадан құрылып жатқан Іле ауданына бас сәулетші қызметіне тағайындаған. Осылайша Шәбден Жүнісұлының құрылысшы қызметі басталған болатын. Өзінің 75 жылдық ғұмырында талай жерде еңбек етіпті. Құрылыс компаниясының бас инженері, жылжымалы механикаландырылған колоннаның басшысы, облыстық ауылшаруашылығы басқармасы жанындағы құрылыс бөлімінің жетекшісі, республикалық дәрежедегі құрылыс тресі бастығының орынбасары, бас инженері, құрылыс бірлестігінің вице-президенті лауазымдарын атқара жүріп, өз қолымен салынған ғимараттарда есеп жоқ. Қарап отырса, 150-ден аса мектептің, 10 Мәдениет үйінің, көптеген зауыт-фабрикалардың, тауарлы-сүт фермалары мен машина-тракторлар шеберханаларының бой көтеруіне тікелей атсалысқан екен. Ал салынған тұрғын үйлердің санында есеп жоқ. Бір ғана, өзінің туған ауылы Түргендегі Мәдениет үйін салудағы еңбегін айтса жеткілікті. Бір кездері басталып, аяқсыз қалған мәдениет ғимаратының құрылысын өзі сұрап алып, жылға жетпес уақытта тамаша аяқтап шыққаны есінде. Оның ашылуына Қазақстан Компартиясының бірінші хатшысы Дінмұхамед Қонаевтың өзі келіп, құрылыстың бас инженері Шәбден Ноғайбаевқа жаңа «Волга» автомашинасының кілтін тапсыруы көп нәрсені аңғартса керек.
Еліміз тәуелсіздік алған жылдары Алматыдағы көптеген жаңа да заманауи ғимараттарды салуға қатысыпты. «ГлавАлматыСрой» құрылыс кешенінің басшысы болған жылдар осының куәсіндей. Ал, зейнет демалысына шыққаннан кейін ұзақ жылғы тәжірибесін бағалаған азаматтар оны құрылыстың техникалық бақылауын жүргізуге шақырған болатын. Аздаған жыл Талғар ауданында жеке кәсіпкерлікпен айналысып, балаларының өз шаруаларын қалыптастыруына көмектескен. Соның нәтижесінде олар бүгінде ешкімнен жәрдем сұрамай, кәсіпкерлікпен айналысуда. Үлкен қызы Шолпан білім беру саласын таңдап, бір мектептің директоры болып жүрсе, жары Баян екеуі тәрбиелеп өсірген екі ұл мен бір қыз жоғары білім алып, заман талабына сай өз істерін дөңгелентіп жүр. Үлкен ұлы Еркін – экономист, қызы Құралай – бухгалтер, кіші ұлы Ерлан – заңгер әрі қаржыгер болғанымен жеке кәсіпкерлікпен айналысуда. Олардан 10 немере көріп, бақытты ата мен әже болған Шәбден аға мен Баян апай бұл күндері берекелі әулеттің иелері. Алайда, бар ғұмырын еңбекпен өткізіп келе жатқан Шәбден аға қартайдым деп қарап отырған жоқ. Ол бүгіндері де құрылыс жұмыстарын бақылауға құқық беретін бірнеше дипломдар алып, салынған ғимараттардың сапасын қадағалауды жүзеге асыруда. Өзінің 75 жасында өте тың әрі еңбекке құштар Шәбден Жүнісұлы әлі де еліме пайдамды тигізсем деп шапқылауда. Ендеше, біз де мерейтой иесін айтулы қуанышымен құттықтап, жұртпен бірге бар жақсылықты тілейік!
Алматы қаласы,
Қуат Қайранбаев.