Алматы облысының қоғамдық-саяси, әлеуметтік-экономикалық газеті

ӘСКЕРИ САЛАДА ЗАҢ БҰЗҒАНДАР. АҒА ПРОКУРОР ОН АЙДЫҢ ЕСЕБІН ЖАРИЯЛАДЫ

Уақыты: 07.12.2021
Оқылды: 842
Бөлім: ҰЛТ ҰЯТЫ

Талдықорған гарнизонында «Тәртіпсіздікке нөлдік төзімділік» принципін іске асыру мақсатында жүргізіліп жатқан алдын алу шараларының нәтижиесінде әкімшілік құқық бұзушылықтар едәуір төмендеді деуге болады. Қазіргі таңда Талдықорған, Үштөбе және Үшарал гарнизондарының әскери бөлім командирлері мен мекеме басшылары әкімшілік құқықбұзушылықтардың алдын алу жұмыстарын жандандыруда.

Әкімшілік заңнамасының сақталуы, қылмыстық қудалау жұмыстары әскери басқару органдарының ведомствоаралық жиналыстарында бірінші басшылардың есебін тыңдау арқылы қаралады. Олардың нәтижесінде әкімшілік құқық бұзушылықтардың алдын алуға және әскери қызметшілердің құқықтық сана-сезімін көтеруге бағытталған нақты шаралар қолдану туралы шешімдер қабылданады.

Әскери басқару және полиция органдары бірігіп, әскери қызметшілердің әкімшілік жауапкершілікке тартылуын анықтау мақсатында ай сайын тиісті базаны қолдану арқылы салыстыру жүргізеді. Атқарылған жұмыс нәтижесінде барлық әскери бөлімдер және мекемелермен төрт жақты салыстыру актілері жасалады (әскери прокурор, әскери басқарманың өкілі, әскери полиция органының бастығы, әскери бөлім командирлері арасында).

2021 жылдың өткен мерзімінде жүргізілген салыстыру бойынша, (2020 жылғы 10 айымен салыстырғанда) әкімшілік құқықбұзушылықтардың саны 6,3 пайызға өсті (778-ден 831-ге дейін).

Өз кезегінде, жасалған әкімшілік құқықбұзушылықтардың басым бөлігі жол ережесін бұзғаны үшін болғаны анықталды (831 әкімшілік құқықбұзушылықтың 739-ы жол ережесін бұзу фактілері). Әскери қызметтегі әкімшілік құқықбұзушылықтар 3-тен 7-ге дейін өсті.

Әкімшілік құқық бұзышылықтардың елеулі бөлігі қасақана жасалған болып табылатынын жүргізілген талдау көрсетті (жол қозғалысы ережелерін бұзу және басқа), бұл әскери қызметшілердің заң талаптарын елемеуін білдіреді. Осыған орай әскери қызметшілер арасында әкімшілік құқықбұзушылыққа қасақана жол бергені үшін (2 және одан да көп рет) әскери қызметтен теріс себептер негізінде шығарылатыны бойынша түсіндіру жұмыстары жүргізілуде.

Атап айтқанда, «Әскери қызмет және әскери қызметшілердің мәртебесі туралы» Заңның 26-бабына сай әскери қызметшінің келісімшарттың талаптарын жүйелі түрде бұзуы әскери қызметтен теріс себептер бойынша шығаруға негіз болады. Одан бөлек, қадағалаудағы әкімшілік тәжірибе субъектілерімен 3 923 325 теңге айыппұлмен 627 тұлға жауапқа тартылып, айыппұл соммасы толық өндірілді.

Айта кетейік, «Әкімшілік құқықбұзушылықтарды есепке алу» әкімшілік құқықбұзушылықтар бойынша айыппұлдарды өңдеу және төлеу процесі автоматтандырылған. Бұл әкімшілік айыппұлдарды жергілікті жерде төлеуге (баптың санкциясында көрсетілген айыппұлдың 50 пайызы мөлшерінде төлеу құқығын қолдана отырып), сондай-ақ, ірі банктердің кассалары арқылы төлеу тәртібін едәуір жеңілдетті. Одан бөлек, онлайн режимінде банктердің www.kaspi.kz, www.post.kz және www.homebank.kz интернет-ресурстарында айыппұлды төлеуді, сонымен қатар, олардың төлем терминалдары немесе мобильді қосымшалар арқылы төлеу мүмкіндігі бар.

Азаматтардың қолайлығы үшін qamqor.gov.kz және www.egov.kz мемлекеттік ресурстары да жұмыс істейді. Айыппұлды төлегеннен кейін бұл ақпарат жүйеде 15-20 минут ішінде көрсетіледі. Бұл азаматтарды мемлекеттік органға барудан және төлемді түбіртек арқылы растау қажеттілігінен босатады.

Г.ДӘУРЕНБЕКОВА,

ҚР Бас прокуратурасы Құқықтық статистика және арнайы есепке алу жөніндегі комитеті Талдықорған және Сарыөзек гарнизоны бойынша әскери басқарманың аға прокуроры