Алматы облысының қоғамдық-саяси, әлеуметтік-экономикалық газеті

ЖЕТІМІҢДІ ЖЫЛАТПА, ҚАЗАҚ!

Уақыты: 29.07.2019
Оқылды: 199
Бөлім: ҰЛТ ҰЯТЫ

Қазіргі таңда қоғамдағы етек алып отырған өзекті мәселелердің бірі жетім балалардың жайы екендігі ешкімге жасырын емес. Бүгінде жетімдер көбейген, балалар үйінің саны ұлғайған. Соған қарасақ, жүрегің қан жылайды.

Осындай кереғар тәрбиеленген ұрпақтың қазіргі күйіне кімді кінәлаймыз? Қоғам ба, әлде, мәселе әке-шешеде ме? Атадан тағылым алмаған ұл – жаман, анадан өнеге көрмеген қыз – жаман. Айналып келгенде барлығы да тәрбиеге, ата-ана өнегесіне келіп тіреледі. 
Баяғының бойжеткені мен бозбаласы қандай еді? Ал қазір жағдай мүлдем басқа. Әдемілік пен көркемдіктің, инабаттылық пен әдептіліктің, ар-ұяттың үлгісі ретінде бағаланған қыздарымыз қазіргі таңда тән сұлулықтарына көңіл бөлемін деп жан сұлулықтарын мүлде ұмытып қалған. Әрине, барлық қызға күйе жақпаймын. Алайда, бір құмалақтың бір қарын майды шірітетіні барлығымызға белгілі емес пе? Ер жігіттер ше? Басым көпшілігі қазақ қызының, яғни, өз қарындасының намысын таптап, жауапкершілік дегенді атымен білмейді. 
Иә, бойындағы арын емес, бетінің  әрін ойлаған қазақ қызы мен өне бойы құмарлыққа, желікке толған қазақ жігітінің санасыздығының салдарынан  талай сәби ана қамқорлығы мен әке ұлағатынан қол үзіп, жетім атануда. Бұл – біздің қазақ қоғамына төнген үлкен қауіп, қатерлі дерт. Осы дерттің асқынып кетуінің алдын алу  – тәрбиелі, көзі ашық, жүрегіне иман мен мейірім ұялаған жастардың қолында. 
Бүгінде республикамызда жүз елуден астам жетімдер үйі бар екен. Жыл сайын қазағымның қара домалақ ұлдары мен қаракөз қыздары шетелдік азаматтардың қамқорлықтарына алынуда. Қазақстан Республикасы Статистика комитетінің мәліметіне сүйенсек, 1999-2014 жылдар аралығында 8169 сәбиді шетелдіктер  асырап алған. Соңғы он жылда қазақстандық жетім балалар әлемнің отызға жуық еліне әкетілген. Бұл  төзуге болмайтын жағдай. 
Құрметті жастар, қазақ қызы және қазақ жігіті деген абыройлы атқа сай болайық! Жетімін жылатпаған, жесірін қаңғытпаған, қарттарын қадірлеген қоғамымызды қайта жаңғыртайық!    

Дәрмен ОҢАЛБАЕВ

Сурет ғаламтордан алынды