Облыстық қоғамдық кеңестің кезекті отырысы өтіп, аймақтық басқармалардың жұмыс сапасын жақсарту мәселесі қаралды.
Жиында білім беру мекемелері мен нысандарға іргелес жатқан жол инфрақұрылымының қауіпсіздігін қамтамасыз ету, міндетті әлеуметтік медициналық сақтандыру жүйесінің мәселелері және коммуналдық мемлекеттік мекемелердің 2023 жылы және 2024 жылдың қаңтар-маусым аралығында атқарған жұмыстары талқыланды.
Алқалы жиында бірінші және екінші мәселе бойынша білім беру басқармасы басшысының орынбасары Гүлмира Ахметова баяндады.
– Облыс бойынша барлығы 91 балабақша, 337 мектеп, 21 колледж бейнебақылау камераларымен толық қамтамасыз етілді. Атап айтқанда, аналогтық 2034, цифрлық 15363 камера іске қосылған. 2024 жылы бейнебақылау камераларын жаңғыртуға жергілікті бюджеттен 163,1 млн. теңге қаражат бөлініп, бүгінге дейін 404 білім беру ұйымдарының бейнебақылау камералары жедел басқару орталығына қосылды. Сондай-ақ, облыстағы 431 білім беру ұйымдарында «Дабыл түймелері» орнатылып, жергілікті полиция басқармаларының кезекші бөлімімен байланыс орнады. Онымен қоса, биыл облыстағы білім беру ұйымдарына турникет орнату үшін 213,4 млн. теңге бөлінді. Бүгінгі күні 201 білім беру ұйымдарында жалпы орта білім беретін мектептерде 383 дана турникет орнатылған, – деді ол.
Екінші мәселе бойынша жалпыұлттық іс-шаралар жоспарындағы 87 тармақ «Балалық шақтың қауіпсіз болуын қамтамасыз ету» тапсырмасына сәйкес облыстағы білім беру ұйымдарындағы жол инфрақұрылымының қауіпсіздігін қамтамасыз ету бойынша «2024-2025 жылдарға арналған Жетісу облысының білім беру ұйымдарына іргелес жатқан жол инфрақұрылымының қауіпсіздігін қамтамасыз ету жөніндегі іс-қимыл жоспары» жасалып, бекітіліпті. Білім беру ұйымдарының жол инфрақұрылымының қауіпсіздігін қамтамасыз етуге арналған шаралар 2 кезеңге бөлінген. 1-кезеңде 2024 жылы қалаларда және аудан орталықтарында орналасқан білім беру ұйымдарының, мектепке дейінгі және қосымша білім беру мекемелерін, 2-ші кезеңде келесі жылы ауылдық жерде орналасқан білім беру ұйымдарының жол инфрақұрылымының қауіпсіздігін қамтамасыз ету жоспарланған.
«Балалардың қауіпсіздігі ең өзекті мәселенің бірі. Алайда қауіпсіздікті қамту бағытында бірқатар шешілмеген мәселе бар», – деді облыстық полиция департаменті бастығының бірінші орынбасары, полиция полковнигі Жасұлан Байкенов. Осыған дейін полиция департаменті ақпараттық байланыс басқармасы және жедел басқару орталығымен бірлесіп, білім беру мекемелеріндегі қауіпсіздік шараларын тексеріп қайтты. Бақылау барысында біршама шешілуі тиіс мәселелер анықталып, оларды шешу жұмыстары қолға алынуда.
Күн тәртібіндегі үшінші мәселе бойынша «Әлеуметтік медициналық сақтандыру қоры» коммерциялық емес акционерлік қоғамы Жетісу облысы бойынша филиалының директоры Иван Самойленко баяндама жасады.
– Халықпен жүргізіліп жатқан белсенді ақпараттық-түсіндіру жұмыстарына қарамастан МӘМС жүйесінде сақтандыру үлесі төмен болып тұр. Еліміздегі МӘМС жүйесімен қамту деңгейі 87,9% ды құрайды, ал облыс халқы небәрі 80,2%-ға қамтылған, яғни республикалық рейтинг бойынша Жетісу облысы 19-орында.
Халықты МӘМС жүйесіне тарту үшін Қор филиалы жергілікті атқарушы органдармен бірлесіп тиісті шаралар әзірледі. Олардың ішінде, МӘМС жүйесіне сақтандырылмағандарды тарту бойынша жергілікті атқарушы органдардың атаулы жұмысы жұмыспен қамту орталықтарында тіркеу, жұмысқа орналастыру, қайта оқыту шарасы жүргізілмек.
Басқосудағы төртінші мәселе бойынша облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Сәния Наурызбаева баяндама жасап, 2024 жылдың 1 маусымына жұмыспен қамтуға жәрдемдесудің белсенді шараларымен 12 849 адам қамтылғанын, 10 028 адам жұмысқа орналасқанын айтты.
Айғаным АЙТМҰХАН