«Жетісу» волейбол клубы кейінгі жылдары елімізде үздік нәтиже көрсетіп, Азия құрлығындағы таңдаулы құрамалардың қатарына кірді. Жүйелі жұмыстың нәтижесі қашанда жоғары болмақ. Биыл да «Жетісудан» күтеріміз көп. Осы орайда «Жетісу» волейбол кулбының директоры Нияз Жантілеуовпен әңгімелескен едік.
– Жаңа маусымға деген дайындықтарыңыз қалай, командада қандай өзгерістер болып жатыр?
– Жалпы чемпион болғаннан қарағанда сол атақты сақтап қалған қиын. Екі есе дайындықты талап етеді. Өткен маусымда қыздарымыз да, ұлдарымыз да ел чемпионы атанып, төбемізді көкке жеткізді. Дәл осы көрсеткішпен тоқтап қалғымыз келмейді. Командаларымызға артылған сенім мол. Биыл да тұғырдың биік сатысында тұрғымыз келеді. Сол үшін қазірден бастап іске кірісіп жатырмыз. Қыздарымыз демалыстан келіп, алғашқы оқу-жаттығу жиынына кірісіп кетті. Өзгерістер бар. Сербиялық байланыстырушы Мария Милевич, ресейлік шабуылшы Ольга Зверева командамызға келді. Өткен маусымда Қазақстан чемпионатында «Үздік шабуылшы» болған қытайлық Мяо Ивэнмен келісім шартты ұзарттық. Одан бөлек Ұлттық құраманың ойыншылары Полина Уфимцевамен Алина Алимекбова қатарымызды толықтырды. Ал 2 жылдан астам уақыт «Жетісу» сапында үздік ойынымен көзге түскен Кристина Аниконова, Дарья Шаргородская, Валерия Якутина өз таңдаулары бойынша клубтан кетті. Осындай өзгерістеріміз бар.
– Алғашқы оқу-жаттығу жиынына ойыншылар толық қатысып жатыр ма?
– Жоқ. Дәл қазір Ұлттар лигасында Сербия құрамасында ойнап жатқан Мария Милевич, одан бөлек Мяо Ивэн командаға кейін қосылады. Ал Қазақстан құрамасында ойнайтын волейболшыларымыз Қытайда болатын турнирге және Жапонияда өтетін Азия ойындарына қатысу үшін шілденің аяғынан бастап кетеді. Ұлттық құрамаға шақырту алған ойыншыларымыз басқа командалармен салыстырғанда көп. Бұл қатарда Татьяна Никитина, Кристина Белова, Мадина Бекет, Перизат Нұрбергенова, Мария Сырыгина, Полина Уфимцева, Алина Алимбекова, Наталья Борисенко бар. Ал олардың орнына қосалқы құрамнан Эвелина Черепкова, Ульяна Кокина, Александра Шиндова, Мерей Ақжолтай командамен оқу-жаттығу жиынын өткізеді. Бұл жас ойынышыларымызға берілген мүмкіндік. Өздерін жақсы көрсетіп жатса, негізгі құрамға қабылдаймыз.
– Биыл Қазақстан чемпионатының форматы өзгереді деп жатыр…
– Әлі нақты ештеңке айтылмады. Өзгереді дегенді естідік. Оны әлеуметтік желідегі инсайдпен айналысатын, елдегі волейбол жаңалықтарымен бөлісіп отыратындардың парақшаларынан оқыдық. Ол жерде үйде және түзде екі ойын өтеді делінген. Бірақ Қазақстан волейбол федерациясы ресми ештеңке жарияланған жоқ. Мүмкін бұрынғы форматта қалады. Біздің команда кез-келген өзгеріске дайын.
– Сұхбатыңызға рақмет!
Серік ҚАНТАЙ
