Қазақстандықтарға ұялы телефон арқылы хабарласқан заңды ұйымдар мен компаниялардың аты-жөні экранда автоматты түрде шығады, – деп хабарлайды 7-su.kz ақпараттық порталы.
Елде банктерден, тұтынушыларды қолдау орталықтарынан және өзге де мекемелерден түсетін қоңырауларды міндетті түрде сәйкестендіру жүйесі енгізіліп жатыр.
Жасанды интеллект және цифрлық даму министрінің орынбасары Досжан Мұсалиевтің айтуынша, бұл қадам азаматтарды киберқылмыскерлерден қорғауға бағытталған.
«Абоненттерге заңды және жалған қоңырауларды ажыратуға көмектесу үшін ұялы телефон құрылғыларында қоңырауларды белгілеу енгізілді. Банктерден, қызмет көрсетушілерден және басқа да ұйымдардан келетін заңды қоңыраулар телефон экранында көрсетіледі», – деді вице-министр.
Жаңа ережелер келесі айдың соңында күшіне енеді. Бұл ретте байланыс желілерін қорғауға әрі кибералаяқтықпен күресуге бағытталған өзге де заңнамалық түзетулер қатар қолданысқа беріледі. Сонымен қатар министрлік мамандары тек техникалық тосқауылдармен шектелуге болмайтынын ескертеді. Себебі алаяқтар алдаудың жаңа әдістерін ойлап табуда. Осыған байланысты халықтың цифрлық сауаттылығын ұдайы арттырып отыру – негізгі міндеттердің бірі.
Сондай-ақ жауапты министрлік ұялы байланыс операторларының ақылы сервистеріне қатысты түйткілді шешті. Смартфон қолданушылары байқаусызда бір түймені басып қалу арқылы ақылы қызметтерге қосылып кететін ескі жағдай енді қайталанбайды. Операторлар кез келген қосымша қызметті тек пайдаланушы SMS арқылы немесе арнайы қоңырауда жеке келісімін растаған соң ғана қосуға міндеттелді.
Бұған дейін тұрғындар тарапынан қажетсіз «маяк» пен түнделетіп келетін хабарламаларға қатысты шағым көбейген еді. Жаңа талаптар күшіне енген соң мұндай мазасыз қоңыраулар тоқтап, орнын тек ресми хабарламалар басады. Бұл азаматтардың қаржылық қауіпсіздігін арттырып, мобильді байланыс сапасын реттеуге мүмкіндік береді.
