«ӘDILET» партиясының Жетісу облыстық сайлауалды штабының өкілдері «Halyk Bank» АҚ еңбек ұжымымен кездесу өткізді. Іс-шара ашық пікір алмасу форматында ұйымдастырылып, онда құқықтық жүйені жетілдіру, мемлекеттік басқаруды дамыту және цифрлық технологиялардың қоғам өміріндегі рөліне қатысты өзекті мәселелер талқыланды.
Кездесу барысында спикерлер цифрлық шешімдерді мемлекеттік қызмет көрсету мен басқару үдерістеріне енгізудің маңыздылығына, сот және құқық қорғау жүйесін жетілдіру бағытындағы өзгерістерге, сондай-ақ азаматтардың құқықтары мен заңды мүдделерін қорғауға қатысты мәселелерге тоқталды. Сонымен қатар мемлекет пен қоғам арасындағы өзара сенім мен ашықтықты нығайтуға бағытталған бастамалар жөнінде пікір алмасты.
Жиын барысында жаңа Конституцияның негізгі қағидаттары да сөз болды. Қатысушылар конституциялық өзгерістерде заң үстемдігі, әділеттілік, қоғамдық жауапкершілік, қоршаған ортаны қорғау, сондай-ақ білім, ғылым, мәдениет және инновация салаларын дамытуға басымдық берілгенін атап өтті. Сонымен бірге бұл бағыттардың мемлекеттік институттарды жетілдіру мен қоғамның тұрақты дамуына ықпалы жөнінде ой бөлісті.
Кездесудің негізгі бөлігі сұрақ-жауап және пікір алмасу форматында өтті. Банк қызметкерлері өздерін қызықтырған мәселелер бойынша сауалдарын қойып, ұсыныстары мен пікірлерін білдірді. Өз кезегінде штаб өкілдері көтерілген мәселелер назарға алынатынын айтып, ұсыныстарды зерделеу қажеттігін жеткізді.
Жиын ашық диалог жағдайында өтіп, түрлі көзқарастар мен ұсыныстардың талқылануына мүмкіндік берді.
