Ұлттық құрылтай – халықтың сөзін тыңдап, елдің ертеңіне керек мәселелерді талқылайтын маңызды жиын. Онда айтылған бастамалар халықтың тұрмысын жақсартуға қызмет етсе екен дейміз. Елдік мүддені ту еткен бұл өзгеріс Әділетті Қазақстанды орнықтыру жолындағы маңызды қадамдардың біріне айналады деп сенеміз.
Ел еңсесін тіктеп келеді. Балқаш бағытына жол салынды, электр желілері тартылып, елге қолайлы жағдай жасалуда. Осындай жұмыстар жалғаса берсе екен деп тілейміз. Халыққа ең керегі – тыныштық пен тұрақтылық.
Жастық шағым Лепсі Бөрлітөбе ауданының орталығы болған кезеңмен тұспа-тұс келді. Сол жылдары аудандық партия комитеті, атқару комитеті, балабақша сияқты әлеуметтік нысандардың салынуына құрылысшы ретінде атсалыстым. Ол кезде бәріміз туған жеріміз көркейсе деп еңбек еттік. Қазір сол ғимараттарды көрген сайын өткен күндер еске түседі, еңбегіміздің зая кетпегеніне қуанамыз.
Құрылтайда осындай ауылдардың жағдайы, жастардың болашағы, елдің дамуы туралы мәселелер көбірек көтеріліп, нақты шешімдер қабылданса деймін. Ең бастысы, ел аман, жұрт тыныш болып, Қазақстанымыздың дамуы тоқтамасын.
Әділхан Бижігітов,
Лепсі ауылының тұрғыны
Сарқан ауданы
