«Бір тал кессең, он тал ек» деген дана халқымыз табиғатқа құрметпен қарауды ұрпақ санасына ежелден сіңіріп келген. Жер-Ананың көркіне көрік қосып, тіршілік атаулыға сая болатын орман халқымыздың баға жетпес байлығы. Ол адамзатқа таза ауа сыйлайды, климаттың тұрақтылығын сақтайды, сан алуан жануарлар мен өсімдіктердің өсіп-өркендеуіне қолайлы орта қалыптастырады.
Табиғатты алаңдатқан ең күрделі түйткілдердің бірі – орман өрттері. Жыл сайын еліміздің әр өңірінде жүздеген гектар жасыл желек өртеніп, табиғатқа орасан нұқсан келуде. Мұндай апаттың салдары бір ғана ағаштың күйіп кетуімен шектелмейді. Құстардың ұясы, аң-құстың мекені, өсімдіктер дүниесі зардап шегіп, табиғи тепе-теңдік бұзылады. Салдарынан ұзақ жылдар бойы сезіліп, экологиялық ахуалға ауыр әсерін тигізеді. Өкінішке қарай, өрттің басым бөлігі адамның салғырттығынан туындайды. Табиғат аясында демалып, алау жаққаннан кейін оны толық өшірмеу, темекі тұқылын қалай болса солай тастау, шыны бөтелкелер мен өзге де қалдықтарды орман ішінде қалдыру, құрғақ шөпке от қою – мұның бәрі алапат өрттің басталуына себеп болады.
Орман ішінде отты тек арнайы белгіленген орында жағу, демалыс соңында шоқтың толық сөнгеніне көз жеткізу, темекі тұқылын өшірмей жерге тастамау, шыны қалдықтарын қалдырмау, құрғақ шөпті әдейі өртемеу – табиғатты сақтаудың ең қарапайым әрі тиімді жолдары. Бұл талаптар әркімнің күнделікті дағдысына айналғанда ғана жасыл желекті қауіптен қорғай аламыз.
Орманнан түтіннің иісі сезілсе немесе жалынның алғашқы белгілері байқалса, уақыт оздырмай 101 қызметіне хабар беру қажет. Сонымен қатар жақын маңдағы орман шаруашылығы мамандарына ақпарат жеткізу де аса маңызды. Өрттің бастапқы кезеңінде жасалған жедел әрекет талай гектар орманды аман алып қалуға сеп болады.
Табиғатты аялау арқылы туған жердің көркін сақтап, келер ұрпаққа көкорайлы өлкені аманаттаймыз. Әр азамат осы ұстанымды өмірлік қағидасына айналдырса, жасыл желегіміз жайқалып, табиғаттың тынысы кеңейе түсері сөзсіз.
А. АБИЛЬХАНОВ,
облыстық орман шаруашылығы
және жануарлар дүниесі аумақтық
инспекциясы РММ орман және ерекше қорғалатын
табиғи аумақтар бөлімінің бас маманы
