Теміржолшылар күніне орай Достық стансысында салтанатты шара ұйымдастырылып, сала ардагерлері мен үздік қызметкерлерге құрмет көрсетілді.
Шара барысында «ҚТЖ – Жүк тасымалы» ЖШС «Достық» филиалының директоры Диас Байгонусов теміржол саласының дамуына сүбелі үлес қосып жүрген қызметкерлерге салалық марапаттарды табыстады.
Атап айтқанда, бірқатар қызметкер «Адал еңбек», «Жас үздік маман», «Үздік машинист», «Үздік теміржолшы» төсбелгілерімен және Құрмет грамоталары, Алғыс хаттармен марапатталды.
Марапаттау рәсімінде әріптестердің кәсібилігі, жауапкершілігі мен теміржол саласының қауіпсіз әрі үздіксіз жұмысын қамтамасыз етудегі еңбегі жоғары бағаланды.
Мерекелік шараның жалғасы Теміржолшылар саябағында өткен концерттік бағдарламаға ұласты. Кештің құрметті қонақтары – ASIA және MELOMEN топтары танымал әндерін орындап, теміржолшылар мен қала тұрғындарына ерекше мерекелік көңіл күй сыйлады. Көрермендер сүйікті әндерге қосылып ән шырқап, көтеріңкі көңіл күйде тамаша кештің куәсі болды.
Концерт соңында мерекелік отшашу ұйымдастырылып, түнгі аспанды сан түрлі жарқын бояуларға бөледі. Бұл көрініс Теміржолшылар күніне арналған мерекелік кештің есте қаларлық жарқын қорытындысына айналды.
«Жетісу-Ақпарат»
