Қазақ тумысынан ақынын сыйлап, төрге оздыра білген халық. Ол сөздің қадірін ұғынып, қасиетіне жете білуімен әрдайым дара. Осы ретте Сарқан қаласында Қазақстан Жазушылар одағының мүшесі, Халықаралық «Алаш» әдеби сыйлығының лауреаты Жомарт Игіман шығармашылығына негізделген жас ақындар байқауы өтті.
Жомарт Мақатұлының шығармашылығын жастар арасында насихаттап, ақынның туындылары арқылы жас ұрпақты адамгершілікке, ұлттық рухқа, отансүйгіштікке тәрбиелеу мақсатында ұйымдастырылған биылғы дәстүрлі байқауға 17 оқушы қатысты. Олар ақынның бір туындысын және өз шығармашылығынан өлеңдер оқып сынға түсті.
Шайырлар байқауында Сарқан ауданының ішкі саясат, мәдениет, тілдерді дамыту және спорт бөлімінің басшысы Дидар Сағынғали, балалар шығармашылық үйінің директоры Марат Қалиев, аудандық кітапхана директоры Гүлнар Мұхаметқалиева қазылық етті. Қазылар алқасы талапкерлердің оқу шеберлігін, дауыс мәнері мен тіл тазалығын бағалады.
Шара аясында оқырмандарға ақынның Алматы қаласындағы «Үш Қиян» баспасынан жарық көрген «Асу» жыр жинағы, «Бөрлітөбе белестері» энциклопедиясы және «Аңызға айналған Ақсұлу» атты танымдық кітабы таныстырылды.
Байқау жеңімпаздары арнайы диплом, бағалы сыйлықтармен марапатталды.
ӨЗ ТІЛШІМІЗ
