Қазақстанда туризмді мемлекеттік қолдау тетіктері қайта қаралып, ішкі туризм мен туристік инфрақұрылымды дамытуға бағытталған заңнамалық түзетулер күшіне енді, – деп хабарлайды 7-su.kz ақпараттық порталы.
Енгізілген жаңашылдықтар биылғы жылдың наурыз айынан бастап қолданысқа енгізілген «Қазақстан Республикасындағы туристік қызмет туралы» Заң талаптарын жүзеге асыруды көздейді. Басты мақсат – отандық кәсіпкерлер үшін әкімшілік кедергілерді азайту, рәсімдерді барынша ашық ету және мемлекеттік бюджеттен бөлінетін қаржыны тиімді пайдалану.
Отбасылық демалысқа арналған Kids Go Free бағдарламасы бойынша талаптар жүйеленді. Енді бағдарлама аясында балаларға арналған тегін әуе билетін беру үшін турпакетті міндетті түрде ішкі туризм саласындағы туроператор қалыптастыруы тиіс. Турпакет құрамында екі бағытқа эконом-класс әуе билеті және қонақүйде кемінде екі түн орналасу қызметі қамтылуы шарт. Сондай-ақ сапардың төленгенін растайтын түбіртек пен баланы алып жүрген тұлғаның туыстық қатынасын айғақтайтын құжаттарды өткізу міндеттелді.
Елге шетелдік саяхатшыларды тартатын туроператорларға субсидия төлеу шарттары да өзгерді. Саяхатшылардың ел экономикасына қосатын үлесін арттыру мақсатында субсидия алу үшін шетелдік туристің Қазақстанда болу мерзімі кемінде алты түн болып бекітілді. Бұрынғы ереже пандемиядан кейінгі тоқырау кезеңінде уақытша жеңілдік ретінде қолданылған еді. Қазір шетелдік меймандар ағыны 2019 жылғы көрсеткіштен асып түскендіктен, мемлекет ұзақ мерзімді сапарларды ынталандыруды жөн көрді. Әр шетелдік мейман үшін төленетін өтемақы мөлшері бұрынғыша 15 мың теңге деңгейінде сақталды. Мұндай қадам өңірлердегі қонақүй, тамақтану және экскурсия қызметтерінің өркендеуіне оң ықпал етеді.
Жол бойындағы санитариялық-гигиеналық тораптарды күтіп-ұстауға бөлінетін қаржыны бақылау да күшейді. Тазалық, дезинфекция, су, жарық және қалдықтарды шығару шығындарын өтеуге берілетін ай сайынғы 83,3 мың теңге субсидия өзгеріссіз қалды. Алайда енді нысандардың нақты жұмыс істеуін фото-бейнежазбалар мен тұрақты мониторинг арқылы тексеру жүйесі енгізіледі.
Инфрақұрылымдық жобаларды қолдау бойынша мемлекет тау шаңғысы курорттарының жабдықтары мен туристік автобустар құнының 25 пайызын қайтарады. Ал жол бойындағы сервис нысандары мен визит-орталықтар құрылысы шығындарының 10 пайызын өтеп береді.
Сонымен қатар басым туристік аумақтарды айқындау құқығы жергілікті атқарушы органдарға берілді. Өңірлік әкімдіктер өз аймағының ерекшелігін ескере отырып, даму әлеуеті жоғары жерлерді жедел анықтай алады
