Елордада Жетісу облысының бай тарихи мұрасы, ұлттық қолөнері, аграрлық әлеуеті мен заманауи креативті индустриясын таныстыратын ауқымды жәрмеңке өтеді, – деп хабарлайды 7-su.kz ақпараттық порталы.
15-16 тамыз күндері Астана қаласы, Жошы хан көшесі, 16/2 мекенжайында ұйымдастырылатын мәдени-экономикалық шара өңірдің өсіп-өркендеген келбетін жан-жақты көрсетеді. Келушілер үшін арнайы жасақталған бірнеше тақырыптық аймақ жұмыс істейді. Атап айтқанда, Жетісудың табиғи ерекшеліктерін таныстыратын Welcome Zone, ұлттық қолөнер мен этнодизайн өнімдері қойылған Қолөнер залы және жергілікті ауыл шаруашылығы тауарлары мен заманауи шешімдер тоғысқан QAZYNA HALL алаңы қонақтарды қарсы алады. Сондай-ақ қазақтың дәстүрлі музыкалық аспаптар әлемі, NOMAD ART HALL аясындағы театрландырылған қойылымдар, NOMAD STYLE SHOW көрсетілімдері және «JETSІU CREATIVE» бейнеролигі көпшілік назарына ұсынылады. ETHNO VILLAGE пен Ұлттық киім галереясы ұлттық тұрмыстық бұйымдарды, ат әбзелдерін және заманауи дизайнерлердің авторлық топтамаларын паш етіп, халыққа рухани эстетика сыйлайды.
Мұндай өңіраралық іс-шаралар мәдени байланыстарды нығайтып қана қоймай, туризм мен кәсіпкерлікті дамытуға тың серпін береді. Жергілікті өндірушілердің жетістіктерін көрсету арқылы өңірдің инвестициялық тартымдылығы артып, жаңа әрі тиімді серіктестік қатынастар орнатылады.
Елдің мәдени өміріндегі жарқын оқиғаларды жіберіп алмау үшін сайтымызды тұрақты түрде қадағалап, маңызды жаңалықтардан хабардар болыңыздар.
