Жетісу облысында жол-көлік оқиғасынан кейін оқиға орнынан ізін суытпақ болған жүргізушіні тәртіп сақшылары ұзақ қуғыннан соң қолға түсірді, – деп хабарлайды 7-su.kz ақпараттық порталы NUR.KZ сайтына сілтеме жасап.
Өңірлік Департамент өкілдерінің мәліметінше, түн ортасында Алматы – Өскемен тасжолында авария болғаны туралы хабар түскен. Куәгерлер қатысушылардың бірі жасырынмақ болғанын жеткізген. Тәртіп сақшылары дереу жедел әрекет етіп, көлікті іздеуге кіріскен. Нәтижесінде Nissan Cefiro көлігі Қонаев қаласы бағытында қашып бара жатқан жерінде тоқтатылды. Тексеру барысында рөлде отырған Ескелді ауданының 25 жастағы тұрғыны мас күйде болғаны анықталды. Ол арақашықтықты сақтамай, басқа көлікпен соқтығысып қалған.
Медициналық сараптама жүргізушінің ішімдік ішкенін толық растады. Сонымен қатар бұған дейін азамат көлік басқару құқығынан 7 жылға айырылғаны белгілі болды. Заң талаптарын өрескел бұзған күдікті уақытша ұстау изоляторына қамалып, қазіргі уақытта тергеу амалдары жүргізіліп жатыр.
Жол қауіпсіздігін сақтау және мас күйінде көлік тізгіндеудің алдын алу – қоғамның басты міндеттерінің бірі. Мұндай жағымсыз жағдайлардың санын азайту мақсатында полиция қызметкерлері түсіндіру жұмыстарын жүргізіп, қатаң бақылау орнатқан. Әрбір азамат жол ережесін қатаң сақтап, өзгелердің өміріне қауіп төндірмеуі тиіс.
