Армения астанасы Ереван қаласында өтіп жатқан БҰҰ Биоалуантүрлілік бойынша конференциясы (COP17) аясындағы көшбасшылар саммитінде жаһандық экологиялық қауіпсіздік пен табиғи экожүйені сақтау мәселелері кеңінен талқыланды, – деп хабарлайды 7-su.kz ақпараттық порталы.
Ауқымды халықаралық форумда Мемлекет басшысы Қасым-Жомарт Тоқаев сөз сөйлеп, саммитке қатысушыларға ілтипат білдірді. Ел Президенті қонақжайлық танытқаны және жоғары деңгейде халықаралық жиын ұйымдастырғаны үшін Армения Премьер-министрі Никол Пашинянға ризашылығын білдірді. Қасым-Жомарт Тоқаев өз сөзінде табиғатты сақтау, шөлейттенумен күресу және биоалуантүрлілікті қорғау бойынша келер ұрпақ алдында ортақ жауапкершілік бар екенін баса айтты.
Жиын барысында Қасым-Жомарт Тоқаев:
«Біз табиғат тартуын болашаққа жеткізуді көздейтін халықаралық ынтымақтастықты кеңейту мақсатында жиналып отырмыз. Яғни күрделі сын-қатерлермен бетпе-бет келуі ықтимал өскелең ұрпақ алдындағы ортақ жауапкершілік жөнінде сөз қозғадық. Бұл – біздің өркениетіміздің аман қалуына да қатысты мәселе. Өйткені биоалуантүрлілік адамдар игілігін, экономикалық орнықтылықты және ұзақмерзімді қауіпсіздікті қамтамасыз етуде өте қажет. Бүлінбеген экожүйелер азық-түлік өндірісінде, су ресурстарын қорғауда және миллиондаған адамды кіріс көзімен қамтуда маңызды рөл атқарады. Шөлейттену және су тапшылығы, басқа да экологиялық проблемалар табиғат пен адам арасындағы нәзік тепе-теңдікке орасан қауіп төндіреді. Судың жеткіліксіздігі мен жердің тозуы миллиондаған адам үшін үйреншікті жағдайға айналды. Мұның салдары тым ауыр. Себебі бұл үдерістер мемлекеттер аумағынан ары асып, орнықты дамуды тежейді әрі жаһандық тұрақтылыққа зардабын тигізеді. Мұқият ойластырылған және нақты шараларды қамтитын экологиялық күн тәртібі саяси қайшылықтарды еңсеруі қажет. Бізге шынайы серіктестікке, бөліп-жармауға негізделген, ең бастысы, нақты нәтижелерге қол жеткізуді көздейтін халықаралық ынтымақтастық керек», – деді.
Мемлекет басшысы көтерген бұл бастамалар жаһандық деңгейде ғана емес, Жетісу өңірі сияқты табиғи қорықтары мен өзен-көлдері мол аймақтар үшін де айрықша мәнге ие. Балқаш-Алакөл бассейніндегі су ресурстарын тиімді пайдалану, Іле-Алатауы мен Жоңғар Алатауы ұлттық паркторындағы биоалуантүрлілікті сақтау аймақтың экологиялық тұрақтылығының негізгі діңгегі. Халықаралық деңгейде қабылданатын бірлескен шешімдер мен эко-жобалар өңірдегі табиғи балансты сақтауға, су тапшылығының алдын алуға және жасыл технологияларды енгізуге оң серпін береді.
