Мемлекет басшысы Қасым-Жомарт Тоқаев «Шәмші Қалдаяқов» медалі мен «Қазақстанның еңбек сіңірген суретшісі» құрметті атағын енгізіп, мемлекеттік наградалар тізімін толықтырды, – деп хабарлайды 7-su.kz ақпараттық порталы.
Ел арасында «Қазақ вальсінің королі» атанған ұлы композитор Шәмші Қалдаяқовтың есімін ұлықтау – ұлттық өнерді бағалаудың жарқын үлгісі. Мемлекеттік жүйеде жаңа марапаттардың пайда болуы мәдениет пен өнер саласы майталмандарының еңбегін елеп-ескеруге бағытталған маңызды қадам. Мемлекет басшысының кеңесшісі – баспасөз хатшысы Айбек Смадияров атап өткендей, мәдениет пен өнер еліміздің ұлттық бірегейлігінің мызғымас тірегі болып келеді. Осы себепті жаңа Ата заңда төл мәдениетімізді жан-жақты қолдау мемлекеттің конституциялық міндеті ретінде бекітілді.
Президенттің бұл шешімі еліміздегі шығармашылық өкілдерін ынталандыруға зор серпін береді. Мемлекеттік наградалар тізіміне енгізілген бұл марапаттар ұлт мәдениетіне қалтқысыз қызмет етіп жүрген тұлғаларға тағайындалады.
Өнер саласының дамуына өзіндік өрнегін қосқан азаматтар енді арнайы құрметке ие болады. Атап айтқанда:
-
«Шәмші Қалдаяқов» медалі – отандық музыка өнерін өркендетуге, ұлттық саз өнерін насихаттауға және жаңа туындылар дайындауға сүбелі үлес қосқан композиторлар мен музыканттарға;
-
«Қазақстанның еңбек сіңірген суретшісі» құрметті атағы – бейнелеу өнері, мүсіндеу, графика, қолөнер саласында өнімді еңбек етіп, ұлттық бояуды әлемдік деңгейде танытқан қылқалам шеберлеріне беріледі.
Бұл қадам отандық мәдениет өкілдерінің еңбегін бағалап қана қоймай, жас дарындардың кәсіби өсуіне де дем береді. Елімізде 10-15 мыңнан астам шығармашылық өкілі қызмет етеді. Олардың ішінде музыка мен бейнелеу өнерінде жүрген 2-3 мыңнан астам маман бар. Жаңа жүйе арқылы мемлекет дарынды азаматтардың әлеуметтік статусын көтеріп, еңбектерін әділ бағалауды көздейді.
Бұған дейін бейнелеу өнері өкілдері мен композиторларға берілетін арнайы салалық наградалардың аздығы жиі айтылатын. Көптеген суретшілер мен сазгерлердің еңбегі жалпы әлеуметтік марапаттар аясында қалып қойып жатты. Жаңа марапаттардың енгізілуі осы мәселені толықтай шешеді.
