Талдықорғанда ҚР ҰҚК Шекара қызметінің Жетісу облыстық департаментіне арналған жаңа әкімшілік кешеннің іргетасына «Уақыт капсуласы» қойылды. Салтанатты шараға облыс әкімі Бейбіт Исабаев, шекара қызметінің басшылығы мен жеке құрамы, ардагерлер, мемлекеттік органдардың өкілдері қатысты.
Аймақ басшысы Бейбіт Исабаев жаңа ғимараттың құрылысы шекарашыларға жасалған мемлекеттік қолдаудың нақты көрінісі екенін атап өтті.
Мемлекеттік шекараны қор-ғау – аса зор жауапкершілік пен қырағылықты, кәсіби шеберлік пен отансүйгіштікті талап ететін абыройлы міндет. Бүгін құрылысы басталғалы отырған жаңа ғимарат шекара қауіпсіздігін қамтамасыз ететін азаматтарға жасалған жағдайдың, мемлекет тарапынан көрсетілген қолдаудың нақты көрінісі, – деді облыс әкімі.
Жаңа әкімшілік қалашық Талдықорған қаласындағы Н. Назарбаев көшесі, 1/11 мекенжайындағы 4 гек- тар аумақта бой көтереді. Жоба департаменттің қызметін тиімді ұйымдастырып, жеке құрамға заманауи әрі қолайлы қызметтік жағдай жасамақ. Кешен жалпы аумағы 17035 шаршы метрді, құрылыс салынатын бөлігі 6123 шаршы метрді құрайды. Нысан келсі жылы қолданысқа берілмек. Кешен құрамында екі блоктан тұратын әкімшілік ғимарат, қонақүй мен жатақхана, 20 жеңіл және 10 жүк көлігіне арналған гараж, бақылау-өткізу пункті, автокөліктерге техникалық қызмет көрсету және автожуу ғимараты, қоймалар, өрт сөндіру сорғы стансысы мен автожанармай құю стансысы қарастырылған. Құрылыс-монтаждау жұмыстарын «Жаңатас Құрылыс Сервис» ЖШС, техникалық қадағалауды «KZ Стройэксперт» ЖШС, авторлық қадағалауды «Проектировщик» ЖШС жүзеге асырады.
Шара аясында ҚР ҰҚК Шекара қызметінің облыстық департаментінің бастығы Марат Нарыбаев заманауи талаптарға сай салынатын кешен жеке құрамның тиімді қызмет атқаруына және басқару жұмысын сапалы ұйымдастыруға мүмкіндік беретінін атап өтті.
Салтанатты шараның маңызды бөлігі кешеннің іргетасына «Уақыт капсуласын» қою рәсіміне арналды.
Бүгін қойылатын «Уақыт капсуласы» – тарихи сәтті болашақ ұрпаққа жеткізетін символдық аманат. Бұл капсулаға бүгінгінің үміті мен сенімі, ел шекарасының берік әрі қауіпсіз болуына деген тілегіміз бірге енеді, – деді облыс әкімі.
Шара барысында шекара қызметінің ардагерлеріне де құрмет көрсетілді. Аға буын қалыптастырған кәсіби дәстүр мен әскери тәртіпті шекарашылар лайықты жалғастырып келеді.
Жаңа әкімшілік кешеннің бой көтеруі шекарашыларға қолайлы жағдай жасаумен қатар мемлекеттік шекараны қорғау ісін жетілдіруге бағытталған маңызды қадам. Заманауи инфрақұрылым департаменттің басқару жұмыстарын тиімді жүргізуге және жеке құрамның қызметін сапалы ұйымдастыруға мүмкіндік береді.
Қажет АНДАС
