Ескелді ауданында Құрылтай депутаттарын сайлау жалғасуда. Таңертеңнен бастап ауылдық округтердің тұрғындары сайлау учаскелеріне келіп, өздерінің дауыс беру құқығын пайдаланып, маңызды қоғамдық-саяси шараға қатысуда.
Ешкіөлмес ауылындағы №116 сайлау учаскесінде «Хильниченко и К» шаруа қожалығының қызметкерлері өз таңдауын жасады. Кәсіпорынның 30-ға жуық қызметкері сайлау учаскесіне бірге келді. Ұжым үшін бұл азаматтық борышын орындаумен қатар, туған өлкенің одан әрі дамуына деген қызығушылығын білдірудің мүмкіндігі болды.
– Біз осында тұрып, еңбек етіп жатырмыз. Сондықтан ауданымыз бен ауылымыздың болашағы қандай болатыны бізге бейжай емес. Бүгін әрқайсымыз өз ұстанымымызды білдіре аламыз. Сайлауға қатысу – әр азаматтың жауапкершілігі деп санаймын. Біздің жұмысымыз жерге, ауыл шаруашылығына жасалған жағдайға, инфрақұрылымның дамуы мен ауылды қолдауға байланысты. Сондықтан елде болып жатқан жағдайларға мұқият қараймыз және осындай сайлауға қатысуды қажет деп есептейміз. Бұл – біздің ортақ таңдауымыз әрі жауапкершілігіміз, – деді сайлаушылар.
«Хильниченко и К» шаруа қожалығы 1998 жылы Виктор Хильниченконің басшылығымен құрылған. Кәсіпорын көп жылдық жұмысы барысында Ескелді ауданындағы ірі ауыл шаруашылығы өндірушілерінің біріне айналды. Бүгінде мұнда егін және мал шаруашылығы дамып, ауыл шаруашылығы өнімдерін өңдеу жолға қойылған.
Шаруашылықтың жер қоры шамамен 39 мың гектарды құрайды. Егіс алқаптарында бидай, арпа, соя, қант қызылшасы және мал азықтық дақылдар өсіріледі. Сонымен қатар мал шаруашылығы бағыты да дамып келеді. Кәсіпорында жалпы 500-ге жуық адам еңбек етеді.
– Біз үшін өз жұмысымызды сапалы атқару ғана емес, ауданымыздың қоғамдық өмірінің бір бөлігі болу да маңызды. Біз күн сайын жермен жұмыс істеп, өнім өндіреміз, жұмыс орындарын қамтамасыз етеміз. Сайлауға қатысу – елдің болашағына өз үлесімізді қосудың тағы бір мүмкіндігі, – деп атап өтті ұжым қызметкерлері.
«Жетісу-Ақпарат»
