«Душкин» шаруа қожалығының қызметкерлері ел өміріндегі маңызды қоғамдық-саяси шараға белсенді қатысып, өз азаматтық таңдауын жасады.
Шаруа қожалықтың қызметкерлері №372 сайлау учаскесіне келіп, белгіленген тәртіппен дауыс беріп, өздерінің азаматтық құқықтарын жүзеге асырды. Әр қызметкер елдің әлеуметтік-экономикалық дамуына, тұрақтылығы мен болашағына қатысты өз ұстанымын білдіруге мүмкіндік алды.
Ауыл шаруашылығы саласында тынбай еңбек етіп жүрген азаматтар қоғамдық өмірге белсенді араласады. Өйткені еңбеккерлер елдің азық-түлік қауіпсіздігін қамтамасыз етіп, ауылдың дамуына өз үлестерін қосып келеді. Олардың сайлау сияқты маңызды шараларға қатысуы – туған жердің болашағына бейжай қарамайтынын көрсетеді.
– Тұңғыш рет өтіп отырған Құрылтай – ел өміріндегі маңызды тарихи оқиға. Мұндай басқосу халықтың ой-пікірін тыңдап, қоғамның көкейінде жүрген мәселелерді ортаға салып, ел болашағына қатысты ортақ шешімдерге жол ашатыны сөзсіз. «Душкин» шаруа қожалығының басшысы ретінде Құрылтайдың өтуін қолдаймын. Қожалық ұжымы да азаматтық белсенділік танытып, өз таңдауын білдіру үшін Құрылтайға дауыс беруге барды. Бұл – ел тағдырына бейжай қарамайтын әр азаматтың жауапкершілігін көрсетеді. Біз үшін ең бастысы – елдің тыныштығы мен тұрақтылығы. Ауыл шаруашылығымен айналысып, еңбек етіп, елге өнім беріп отырған шаруаларға да тұрақты жағдай ауадай қажет. Береке-бірлік пен бейбітшілік болса, әр адам өз еңбегін алаңсыз атқарып, кәсібін дамытып, отбасына нәпақасын таба алады. Сондықтан Құрылтайдан елдің бірлігі мен ынтымағын одан әрі нығайтатын, халықтың тұрмысын жақсартуға бағытталған нақты бастамалар күтеміз. Ел аман, жұрт тыныш болса – еңбегіміздің де берекесі артады. Тұңғыш Құрылтай ел тарихындағы маңызды белеске айналып, ел игілігі жолындағы жақсы бастамаларға ұйытқы болсын. Басты тілегіміз – елімізде әрдайым тыныштық, тұрақтылық пен татулық орнасын, – дейді шаруашылық басшысы Сергей Душкин.
Дауыс беру барысында ұжым мүшелері ұйымшылдық танытып, азаматтық белсенділіктің үлгісін көрсетті. Өз таңдауын жасау арқылы олар ел тағдырына қатысты маңызды шешімдерге үлес қосты.
Ел болашағы – әр азаматтың таңдауынан басталады. Осы ретте «Душкин» шаруа қожалығы ұжымының дауыс беруге қатысуы азаматтық белсенділік пен елжандылықтың жарқын үлгісі болды.
