Сарыөзек ауылындағы №186 сайлау учаскесінде «Мерейлі отбасы – 2026» байқауының аудандық кезеңінің жеңімпазы атанған Бекбергеновтер отбасы Құрылтай сайлауына қатысып, өз таңдауларын жасады.
Берекесі мен бірлігі жарасқан Бекбергеновтер отбасының ел өміріндегі маңызды науқанға отбасымен бірге қатысуы – отбасылық құндылықтар мен азаматтық жауапкершіліктің сабақтастығын көрсетеді. Татулықты ту еткен отбасы өздерінің ел болашағына бейжай қарамайтынын тағы бір мәрте көрсетті.
– Отбасымен бірге сайлауға қатысып, өз таңдауымызды жасау біз үшін маңызды. Балаларымызға елге деген құрмет пен азаматтық жауапкершіліктің отбасынан басталатынын көрсеткіміз келеді. Отбасы берік болса, қоғам да берік болады. Сондықтан елдің болашағына қатысты маңызды мәселелерге әр азамат өз үлесін қосуы қажет деп санаймын, – деді отағасы.
«Мерейлі отбасы» байқауында топ жарған өнегелі жанұяның бұл бастамасы – отбасы тәрбиесі, бірлік пен елжандылықтың өзара үндесетінін айқындайтын жарқын үлгі. Осындай отбасылардың белсенділігі жас ұрпақты отбасын қадірлеуге, елін сүюге және азаматтық борышын жауапкершілікпен атқаруға үндейді.
