Панфилов ауданының аты аңызға айналған еңбек адамы өз таңдауын жасап, жастарға ақыл-өсиетін айтты.
Жаркент қаласындағы №317 сайлау учаскесінде Панфилов ауданының белгілі тұрғыны, Социалистік Еңбек Ері Күләш Айтжанова дауыс берді. Аймақтың ауыл шаруашылығы саласының дамуына ұзақ жылдар бойы елеулі үлес қосқан ардақты еңбек адамының сайлау учаскесіне келуі күннің маңызды әрі тағылымды оқиғаларының біріне айналды.
Күләш Айтжанова ел көлеміндегі ашық диалогтың және еңбек адамдарына мемлекеттік деңгейде қолдау көрсетудің маңызына тоқталды.
«Құрылтай – халқымыздың маңызды шешімдерді ашық әрі байыпты пікір алмасу арқылы қабылдайтын дәстүрінің жаңғыруы. Бұл биік мінберде әр азаматқа жақын тақырыптар көтеріледі. Олардың қатарында ауыл шаруашылығы еңбеккерлерін қолдау, жастарды еңбекке баулу, аға буынды құрметтеу және қоғамдағы бірлікті нығайту мәселелері бар. Мен үшін адал еңбектің қадірі қайтадан ел дамуының басты бағыттарының біріне айналып келе жатқаны аса маңызды. Сайлауға қатысуым – кейінгі ұрпаққа айтқан өсиетім. Туған жерді аялап, бейбітшілікті бағалаңдар, еңбекті адал атқарыңдар және әрдайым ел тағдырына бейжай қарамай, азаматтық белсенділік танытыңдар», – деді Социалистік Еңбек Ері.
Ұзақ ғұмырында талай белесті бастан өткерген Күләш Айтжанова бір қарапайым ақиқатты берік ұстанып келеді: кез келген қуатты мемлекеттің негізі – туған жер, адал еңбек және халықтың бірлігінде.
