Ақсу ауданы Есеболатов ауылындағы №7 сайлау учаскесіне алпыс жыл отасып, тату ғұмыр кешкен Шанкетовтар әулеті толық құрамда келіп, Құрылтай депутаттарының сайлауына қатысты, – деп хабарлайды 7-su.kz ақпараттық порталы.
Өмірдің талай белесінен өткен отбасы отағасы, тоқсан жасты алқымдаған Қыдыр Шанкетов үшін ел өміріндегі маңызды науқаннан сырт қалу – үлкен жауапкершілік. Ақсақал ұрпағымен бірге келіп, өз таңдауын жасады.
– Жасым тоқсанға таяды. Өмірімде талай кезеңді көрдім. Бүгінгі Құрылтай депутаттарын сайлау науқаны – мемлекетіміз үшін тарихи әрі айрықша күн. Бала-шағаммен бірге келіп, өз дауысымды бергеніме дән ризамын. Ұрпағымның келешегі жарқын, еліміз аман, жұртымыз тыныш болсын, – деді Қыдыр ақсақал.
Алпыс жыл бойы қол ұстасып, өмір жолында бір-біріне тірек болған қариялардың ұрпағымен келіп, азаматтық борышын өтеуі – қоғам үшін үлкен өнеге. Мұндай іс-әрекет жас буынның санасына патриотизм мен елге деген сүйіспеншілікті сіңіреді. Өңір тұрғындарының белсенділігі мемлекеттің әлеуметтік-экономикалық бағытын дамытуға тың серпін береді.
Қыдыр ақсақалдың жас ұрпаққа үлгі болып, елдік маңызы бар науқанда белсенділік танытуы – қоғамдағы бірліктің айқын көрінісі. Азаматтар өз дауысы арқылы аймақтың ертеңін айқындап, әрбір бастаманың жүзеге асуына өз үлесін қосады.
