Талдықорған қаласындағы №413 сайлау учаскесіне жас жұбайлар Дастан Жалғасбай мен Ақбота Ниетбаева, сондай-ақ Жомарт Құрманғалиев пен Ангелина Кнышева келіп, Құрылтай депутаттарын сайлауға бірге қатысты.
Отбасылық өмірге жақында ғана қадам басқан қос жұп үшін бұл күн ерекше мәнге ие болды. Олар алғаш рет ерлі-зайыпты ретінде маңызды қоғамдық-саяси науқанға қатысып, өз таңдауларын жасады.
– Бүгінгі таңдаудың әр азамат үшін маңызы зор деп ойлаймыз. Біз жас отбасы ретінде болашағымызға бейжай қарамаймыз. Ел ертеңіне қатысты маңызды сәтте өз таңдауымызды жасау – азаматтық міндетіміз. Осындай жауапты сәтте жұбымызбен бірге келіп, дауыс беруіміздің де біз үшін өзіндік мәні бар, – дейді жас жұбайлар.
Осылайша, бірге жаңа өмір бастаған қос жас отбасы алғашқы ортақ азаматтық таңдауларын да бірге жасап, бұл күнді өмірлеріндегі есте қаларлық сәттердің біріне айналдырды.
