Жетісу өңірінің тұрғындары ел өміріндегі маңызды саяси науқанда жоғары белсенділік танытуда. Қаратал ауданы Үштөбе қаласының тұрғыны, 90 жастағы ардагер ұстаз Күлсара Тоқпанбаева өз азаматтық таңдауын жасады, – деп хабарлайды 7-su.kz ақпараттық порталы.
Қаратал ауданында көпшілікке сыйлы, ұзақ жылдар бойы жас ұрпаққа білім мен тәрбие берген Күлсара Тоқпанбаева тоғызыншы онжылдықты еңсерсе де, ел болашағына бейжай қарамайтынын кезекті мәрте дәлелдеді. Тоқсан жасқа келген кейуана жауапты сәтте азаматтық жауапкершілігін жоғары деңгейде көрсетті. Тәжірибелі педагогтың бұл қадамы өңір жастары мен барша тұрғындар үшін үлкен өнеге.
Ғұмырын білім саласына арнаған ардагер ұстаз еліміздегі әрбір саяси жаңғыру мен оң өзгерістің мәні зор екенін атап өтті. Саналы өмірінде талай буынды тәрбиелеп шығарған ұлағатты жан әрбір азаматтың дауысы ел дамуы мен тұрақтылығы үшін маңызды рөл атқаратынын жеткізді. Оның айтуынша, заң үстемдігі мен әділетті қоғам құру ең алдымен әрқайсымыздың белсенділігіміз бен жауапкершілігімізге байланысты.
Күлсара Тоқпанбаева сияқты ел ағалары мен ардагер ұстаздардың саяси науқаннан тыс қалмауы өскелең ұрпақты патриотизмге, Отанға деген сүйіспеншілікке баулиды. Бүгінде Жетісу облысында мыңдаған тұрғын өз құқығын пайдаланып, болашақ үшін маңызды таңдау жасауда. Қаратал ауданының сайлау учаскелерінде де дауыс беру процесі барлық санитарлық, құқықтық нормаларға сай ұйымдастырылған.
Ұлағатты ұстаз дауыс бергеннен кейін елге амандық, жұртқа тыныштық, біздің ортақ шаңырағымызға береке тілеп, батасын берді. Ел ертеңіне бейжай қарамайтын азаматтардың белсенділігі арқасында мемлекетіміз жаңа даму кезеңіне нық қадам басады. Әрбір азаматтың таңдауы – ел келешегінің берік қазығы.
