Кербұлақ ауданына қарасты Жоламан ауылында «Ауыл құтқарушылары» жобасы аясында жаңа өрт сөндіру бекетінің салтанатты ашылуы өтті. Жұртшылық үшін айрықша маңызы бар нысанның ел игілігіне берілуі – ауыл қауіпсіздігін арттыру жолындағы елеулі қадам.
Жаңа бекет Жоламан, Сәмен ауылдарының, Алтындала, Архарлы, Саялы стансыларының, сондай-ақ Жоламан стансысының тұрғындарына қызмет көрсетеді. Осылайша аталған елді мекендердегі 1740 тұрғынның қауіпсіздігін қамтамасыз етуге мүмкіндік артып, тілсіз жауға қарсы тұрар жасақтың жедел әрекет етуіне жол ашылды.
Салтанатты жиында облыстық төтенше жағдайлар департаментінің бастығы Қанат Алтынбеков сөз сөйлеп, жаңа нысанның ел үшін маңызын атап өтті.
– Бүгін Жоламан ауылы үшін айтулы күн. «Ауыл құтқарушылары» жобасы аясында бой көтерген бұл бекет – ең алдымен, халықтың қауіпсіздігіне жасалған қамқорлықтың көрінісі. Өрт сөндірушінің міндеті – қиын сәтте елден бұрын қимылдап, қатерге қарсы тұру. Сондықтан мұнда қызмет ететін азаматтардың жауапкершілік жүгі ауыр. Жаңа бекет тұрғындардың қауіпсіздігін қамтамасыз етуге сеп болып, төтенше жағдай кезінде жедел әрекет етуге мүмкіндік береді. Ел аман, жұрт тыныш болсын. Жаңа нысанның жұмысына береке тілеймін, – деді Қанат Дүйсенбекұлы.
Өз кезегінде Кербұлақ ауданының әкімі Жанат Жүнісбеков ауыл жұртын жаңа нысанның ашылуымен құттықтап, мұндай бастамалардың маңызын тілге тиек етті.
Жаңа бекеттің ашылуы ауыл азаматтарының да көңіліне медеу болды. Өйткені төтенше жағдайға неғұрлым ерте ден қою – адам өмірі мен мал-мүлікті сақтап қалудың негізгі шарттарының бірі. Бұған дейін шалғай елді мекендерге жетуге кететін уақыт енді едәуір қысқарады.
– Бұл – ауылымыз үшін көптен күткен игі жаңалық. Төтенше жағдайдың қашан, қай жерде орын алатынын ешкім болжап білмейді. Сондықтан өз ауылымызда арнайы өрт сөндіру бекетінің ашылуы тұрғындарға үлкен сенім мен тыныштық сыйлайды. Енді қандай да бір қауіп төнсе, құтқарушылардың дер кезінде жетіп, жедел шара қолдануға мүмкіндік бар. Осындай ел игілігіне арналған нысандардың қатары көбейе берсін, – деді ауыл тұрғыны Дидар Диханбаев.
Салтанатты шара барысында жұртшылық жаңа өрт сөндіру бекетінің жұмысымен танысып, арнайы техникалар мен құрал-жабдықтардың мүмкіндіктерін көрді. Құтқарушылардың күнделікті қызметінде пайдаланатын жарақтары таныстырылып, төтенше жағдай кезіндегі іс-қимыл барысы көрсетілді.
Жиын соңында өз қызметінде үздік нәтиже көрсеткен бірқатар қызметкерлер мен жобаға белсене атсалысқан азаматтарға құрмет көрсетіліп, марапаттар табысталды.
Ауылдың айбыны – елдің амандығымен өлшенеді. Ал ел тыныштығын күзеткен азаматтың еңбегі қашанда елеулі. Жоламандағы жаңа өрт сөндіру бекеті де осы жауапты міндеттің жүгін арқалап, алты елді мекеннің жұртына қорған болмақ.
Санжар СҰЛТАНҒАЗЫ
