Қант қызылшасы – аймақта ауыл шаруашылығы үшін маңызды дақылдардың бірі. Оның мол өнім беруі шаруалардың еңбегі мен ауа райының қолайлы болуына тікелей байланысты. Қазіргі таңда шаруалар қант қызылшасын жинау науқанына жан-жақты дайындық істерін жүргізуде. Егіс алқаптарындағы техникалардың әзірлігі тексеріліп, жинау жұмыстарына қажетті құрал-жабдықтар ретке келтірілуде. Диқандар да биылғы өнімді ысырапсыз жинап-теріп, белгіленген мерзімде өткізуге күш салуда.
Осыған орай Көксу ауданының әкімі Дәулет Халелов ауыл шаруашылығы саласына жауапты мамандармен бірге Көксу қант зауытының қант қызылшасы өнімін қабылдауға дайындығын тексерді. Зауыт өкілдерінің айтуынша, кәсіпорын 15 қыркүйектен бастап биылғы қант қызылшасы өнімін қабылдауға әзір тұр. Қазіргі таңда науқанды ұйымдасқан түрде өткізу үшін қажетті техникалар мен құрал-жабдықтар толық дайын.
Атап айтқанда, кәсіпорында бағалы дақылды қабылдауға арналған 5 арнайы машина, өнім өлшейтін 3 таразы, сондай-ақ, қызылшаның сапалық көрсеткіштерін анықтайтын зертхана бар. Бұл құрал-жабдықтардың үздіксіз жұмыс істеуі өнім қабылдау науқанының тиімді әрі жүйелі өтуі үшін маңызды. Аудан әкімі жұмыс барысында техникалық құралдардың әзірлігіне, өнім қабылдау үдерісін дұрыс ұйымдастыруға және шаруалар үшін қолайлы жағдай жасауға ерекше назар аударды.
Сала қызметкерлеріне науқан кезінде туындауы мүмкін мәселелердің алдын алып, жұмыстарды үйлесімді жүргізу жөнінде тиісті тапсырмалар берілді. Қызылшаны уақытылы қабылдау, сапасын дұрыс анықтау және сақтауды ұйымдастыру шаруалар үшін де, өңірдің агроөнеркәсіптік кешені үшін де үлкен маңызға ие. Биыл кәсіпорында жиналған өнімді сақтау үшін жалпы көлемі 9 гектарды құрайтын кагат алаңы қарастырылған. Мұндай алаңның жеткілікті болуы жиналған тәтті түбірді тиісті жағдайда сақтап, оны өндірістік үдеріске кезең-кезеңімен бағыттауға мүмкіндік береді.
Қант зауыты үшін науқанның тағы бір маңызды қыры – жергілікті тұрғындарды жұмыспен қамту. Мәліметке сәйкес биылғы тәтті түбірді қабылдау және өңдеу кезеңінде кәсіпорында 470 адам жұмыспен қамтылады. Бұл маусымдық жұмыс орындарының ашылуына және аудан тұрғындарының еңбекпен қамтылуына оң әсер етпек. Ендігі кезекте, еңбегі мен маңдай терін жерге сіңірген шаруалар үшін өсірілген өнімнің уақытылы қабылданып, сапалы өңделуі аса маңызды.
Сондықтан, алдағы қант қызылшасын қабылдау науқаны кезінде зауыт мамандары мен шаруалардың өзара үйлесімді жұмысы басты назарда болмақ. Өйткені даладағы мол өнімді дер кезінде жинап, оны сапалы өңдеу – ауыл шаруашылығы еңбегінің нәтижесін еселеуге мүмкіндік беретін маңызды тетік. Көксу қант зауытының биылғы науқанға дайындығы – өңірде қант қызылшасы өндірісін дамытуға, шаруалардың еңбегін қолдауға және ауыл шаруашылығы саласының тұрақты жұмысын қамтамасыз етуге бағытталған маңызды қадам.
Айгүл БАЙБОСЫНОВА
